Empezar con bo pé sempre da confianza. E hoxe o Dépor ABANCA deu un bo paso nesa liña ao vencer ao filial do FC Barcelona en Abegondo. Fíxoo, ademais, tendo que remontar. Polo que o 2-1 que campeaba no marcador da Cidade Deportiva ao final do partido ten aínda máis mérito.
Final do #DéporABANCABarçaB en #Abegondo, 2-1! Inmellorable arranque d #asnosas en #RetoIberdrola!
🦋 #VoemosXuntas 💙 #MoitoPorVivir pic.twitter.com/dXx17eYEmZ
— RC Deportivo (@RCDeportivo) September 5, 2021
Este arranque de campionato ligueiro na categoría de prata do futbol feminino español era a estrea en partido oficial do novo adestrador, Miguel Llorente. Que, por riba, tiña como rival ao seu ex equipo, o Barça B. O conxunto coruñés empezou por detrás no marcador pero dúas accións a balón parado, primeiro unha falta de María Ruiz, e logo un penalti transformado por Alba Merino, outorgaban o triunfo ás galegas.
Miguel Llorente seguiu o guión polo que xa apostara na pretempada, salvo por un par de modificacións: entrada de Aroa Guerra como dianteira e o desprazamento de María Ruiz cara á esquerda do ataque.
O Barça B abre o marcador por un erro en defensa
As cousas non empezaron ben xa que o primeiro balón que atravesou a área coruñesa acabou no fondo da portería. Un centro cruzado desde a esquerda do ataque despexouno en curto na área Patri López. O balón caeu a pés de María Pérez, que só tivo que empuxar o coiro ao fondo das mallas. Corría o minuto 6 de encontro.
Primeiro cuarto de hora no #DéporABANCABarçaB!
🦋 #VoemosXuntas 💙 #MoitoPorVivir pic.twitter.com/YF6AeDX3yM
— RC Deportivo (@RCDeportivo) September 5, 2021
Despois de moitos minutos de toma e daca, dunha loita constante por facerse coa posesión da pelota, chegou o empate. Mediada a primeira metade, no minuto 23, María Ruiz transformou un libre directo cun golpeo durísimo por encima da barreira #ante o que Meri Muñoz só puido facer a estatua.
Coa igualada reestablecida, empezáronse a producir algunhas chegadas máis claras á área por parte de ambos os conxuntos. No minuto 26, Ornella Vignola disparou por encima do traveseiro da meta defendida por Ana Vales.
Unha hora de encontro do #DéporABANCABarçaB! As branquiazuis empezaron a segunda metade con boas ocasións de Inés e María Ruiz pero as azulgranas responderon cun tiro ao traveseiro de María Pérez!
🦋 #VoemosXuntas 💙 #MoitoPorVivir pic.twitter.com/TZc8iQY5ST
— RC Deportivo (@RCDeportivo) September 5, 2021
Corrí ao minuto 29 de partido cando a deportivista María Ruiz non puido rematar indo ao chan un balón solto na área diante a saída da gardameta. Tras a pausa de hidratación decretada polo colexiado debido á calor reinante en Abegondo chegou un novo intento branquiazul, cun lanzamento cruzado da ariete do Dépor ABANCA Aroa Guerra.
A segunda metade comezou cun Dépor ABANCA máis ofensivo. Nos primeiros instantes, Inés Altamira desviou forzada un balón pasado nun saque de esquina que atrapou a porteira visitante. E María Ruiz, nun libre directo un pouco máis afastado que o do 1-1, púxollo complicado á meta visitante Meri Muñoz.
Con todo, o FC Barcelona B deu un paso adiante rapidamente. No minuto 50, María Pérez estivo a piques de adiantar de novo ao filial azulgrana cun tremendo disparo afastado que repeleu o traveseiro.
E case de inmediato, Ona Baradad chegou con claridade polo extremo dereito pero Ana Vales gañoulle o man a man desviando o coiro co pé a córner. Á hora de xogo, Aroa Guerra protagonizou unha longa carreira pola esquerda do Dépor ABANCA, pero o remate coa zurda da canteirá perdeuse á dereita do portal barcelonista.
Pouco despois chegou a acción que decidiu o partido para o Dépor ABANCA. María Ruiz adiantouse á gardameta nun balón en profundidade, superouna cun chapeu e cando cabeceou xunto ao poste dereito para facer o 2-1, Clara Rodríguez evitouno coa súa man. O colexiado castigou a acción co correspondente penalti e expulsión. Alba Merino enganou a Meri Muñoz desde os 11 metros para colocar, agora si, o 2-1 no marcador e poñer por diante ao conxunto coruñés.
Cunha xogadora máis sobre o terreo de xogo, o Dépor ABANCA tratou de arrefriar o partido con longas posesións, aínda que tamén se achegou con perigo. Alba Merino estivo a piques de facer o terceiro no minuto 73, nun lanzamento desde fóra da área que desbaratou Meri Muñoz nunha gran intervención en dous tempos.
O filial azulgrana, de todos os xeitos, non deu o seu brazo para torcer e no minuto 80 gozou dunha ocasión clarísima. Un veloz coltragolpe acabou con Ari Mingueza cara a cara diante Ana Vales. A azulgrana tentou superar á porteira branquiazul cunha vaselina pero a asturiana adiviñou a súa intención e puido atrapar a pelota.
Ainhoa Marín, no minuto 82, tamén dispuxo doutra oportunidade para pechar o partido cunha gran acción individual na liña de fondo que concluíu cun duro derechazo ao primeiro pau que atrapou a gardameta. O marcador xa non se movería, polo que o encontro concluíu co triunfo coruñés por 2-1.
O Dépor ABANCA adestrarase de novo mañá, luns 6 de setembro ás 17:00, na Cidade Deportiva de Abegondo. O martes 7 haberá xornada de descanso para o plantel deportivista. A seguinte cita ligueira será a próxima fin de semana coa visita ao CE Seagull de Badalona, en hora e día pendente de confirmación.
FICHA TÉCNICA
RC DEPORTIVO ABANCA: Ana Valles, Cris, Inés Altamira, Raquel García, Patri López (Goretti Neira, min. 62), Paula Gutiérrez, Jone Ibáñez, Ainhoa Marín, Alba Merino (Alejandra Serrano, min. 82), María Ruiz e Aroa Guerra (Eva Dios, min. 76).
FC BARCELONA B: Meri Muñoz, Martina Fernández, Berta Doltra, María Molina, Clara Rodríguez, María Pérez, Alba Caño (Ari Mingueza, min. 46), Ona Baradad (Sara Ismael, min. 76), Julia Bartel (Judit Pujols, min. 66), Ornella Vignola (Laura Lobo, min. 76) e Claudia Riumalló.
GOLES: 0-1 María Pérez (min. 6); 1-1 María Ruiz (min. 23); 2-1 Alba Merino, de penalti (min. 65).
ÁRBITRA: Castro Alarcón (c. gallego). Expulsou a Clara Rodríguez (min. 63) con cartón vermello directo. Amosou cartón amarelo a Martina Fernández (min. 65), Jone Ibáñez (min. 71), Alba Merino (min. 78), Claudia Riumalló (min. 79) e Eva Dios (min. 89). También mostró cartón vermello a Fran Martínez Nión, entrenador de porteiras do Dépor ABANCA (min. 45).
INCIDENCIAS: Partido correspondente á 1ª xornada da Liga Reto Iberdrola disputado na Cidade Deportiva de Abegondo con asistencia limitada al 40% da capacidade do recinto deportivo debido ás medidas de prevención para evitar a propagación do virus da COVID-19.
