O Dépor ABANCA quería gañar, pero tivo que se conformar cun empate. Un resultado que confirma a súa recuperación e mantén ás deportivista puntuando tres partidos consecutivos. Nesta ocasión, na súa visita ao Madrid CFF co que empataba 1-1 no último minuto. Repítese que autora do gol foi Peke polo que a recuperación do olfato goleador da xogadora branquiazul segue ligado á mellora de resultado das coruñesas.
En tres xornadas, o RC Deportivo ABANCA sumou sete puntos fronte aos cero sumados nas oito previas. Aínda que nesta xornada tivo que se conformar cun empate, o seu concurso en terras madrileñas confirma a melloría no xogo das galegas, a confianza que recobraron nas súas posibilidades e polo tanto a recuperación anímica do bloque, e o regreso de PekeGol ás celebracións de tantos na Primeira Iberdrola.
As xogadoras que adestra Manu Sánchez seguen en postos de descenso pero a tan so tres puntos de poder abandoalos. Un triunfo das galegas cando un dos seus rivais directos tropece e as branquiazuis respirarán tranquilas.
O Dépor ABANCA plantoulle cara a un pouco regular Madrid CFF que, non en tanto, marcha sétimo na táboa clasificatoria.
Os saques desde o curruncho foron os que facilitaron as primeiras chegadas das madrileñas. Nunha saída para intentar atallar un centro, chocaron Noe Bermúdez e Stephanie Blanco. O golpe foi forte e tivo que seguir xogando cunha vendaxe na cabeza, pero as dúas futbolistas do Dépor ABANCA continuaron sobre o terreo de xogo.
Fiiinaaal do #MadridCFFDéporABANCA en Matapiñonera, 1-1!#TocaVolverseMollar ⚽️ #UnÚnicoLatido 💙 #razónDÉcorazón pic.twitter.com/zdCn7ywvrB
— RC Deportivo (@RCDeportivo) December 19, 2020
Xa na primeira parte Geyse avisaba a Bermúdez do perigo que levaban as súas botas, pero a porteira do Dépor ABANCA gañáballe a partida incluso nun man a man con dobre parada da branquiazul que terminou por mandar o esférico a córner.
Polas galegas contaron con ocasións Stephannie Blanco e Gaby, pero ao remate da primeira metade, o marcador non se tiña movido e seguía véndose no luminoso o 0-0 inicial.
Á volta de vestiarios, aínda que o tono do partido e o dominio do xogo seguiu igual, o acerto ante o marco rival do Madrid CFF lle permitiu ás locales adiantarse no marcador e poñerse 1-0. O gol chegaría de man de Geyse que aproveitaba un rebote e un balón morto que empurraba ao fondo das mallas da portaría defendida por Noe Bermúdez.
Co xogo igualado e as locais por diante, pintaban bastos para as galegas. Pero o equipo que adestra Manu Sánchez perseverou e non tirou a toalla.
Tivo que aguantar até o minuto final de partido para ter premio, pero o tivo. Logo de intentalo por activa e por pasiva coa dupla máxica formada por Athenea e Peke como principal valedora do seu xogo en ataque.
Foi precisamente Ainize Barea, Peke, a que fixo gol a un minuto de que soase o pitido co que remataría o encontro no Matapiñonera.
O Dépor recibe ao Barça en Abegondo o martes ás 14:00 horas
Aínda queda un partido máis de Liga na Primera Iberdrola para as galegas antes de pórlle fin ao 2020. Será na Ciudad Deportiva de Abegondo fronte ao que case todos os equipos consideran o mellor conxunto da categoría este ano: o FC Barcelona. As blaugranas levan nove partidos xogados, e nove vitorias. Invictas e con so un gol en contra e 51 puntos a favor, son o rival máis complicado que se poderán atopar as coruñesas nesta tempada.
Hoxe mesmo, nesta xornada 12 da competición, venceron ao Sevilla por un rotundo 6-0. A anterior impuxéronse a domicilio ao Valencia por 0-7. Ao Santa Teresa o golearon cun 9-0. E so a Real Sociedad foi quen de batir a súa portaría pero perdeu igualmente na 9ª xornada por un marcador de 5-1.
Este reto maiúsculo, o teñen As Nosas branquiazuis o vindeiro martes 22 ás 14:00 horas. Se puntuan ante o líder indiscutible, a súa recuperación será unha realidade indiscutible e sen volta atrás.
FICHA TÉCNICA
MADRID CFF: Sampalo, Joyce, Frisbie, Mónica, Itzi, Estela (Sara Tui, min. 69), Rita, Laurita (Paula, min. 78), Priscila (Silvia Rubio, min. 69), Geyse (Okeke, min. 83) e Maca (Valeria Cantuario, min. 78)
DÉPOR ABANCA: Noe Bermúdez, Cris, Ainoa, Stephannie Blanco, Villegas, Iris Arnaiz, Lía (Michelle, min. 65), Arbeláez (Lady Andrade, min. 82), Gaby, Peke e Athenea del Castillo.
GOLES: 1-0 Geyse (min. 50); 1-1 Peke (min. 90+2)
ÁRBITRA: Elena Peláez Arnillas (Colexion Castilla-León). Amonestou a Cris (min. 36); Joyce (min. 38) e Noelia Villegas (min. 43).
INICIDENCIAS: partido correspondente á duodécima xornada na Primera Iberdrola de fútbol feminino español disputado no campo José Luis de la Hoz-Matapiñonera.
