Última xornada e todo por decidir na Primera Federación Iberdrola. O Dépor ABANCA chega ubicado na terceira praza e con opcións matemáticas para o ascenso directo. O plan B é o play-off. O ascenso, o regreso á máxima categoría do futfem estatal é, en definitiva a meta final, sexa polo camiño curto ou polo longo.
Disposto a soñar en alto, o Dépor ABANCA visita mañá domingo 14 de maio ás 12:00 ao DUX Logroño na Ciudad del Fútbol de Pradoviejo, na última xornada da competición regular nesta categoría de prata do futfem español. O partido, decisivo para a praza de ascenso directo a Primeira División, poderase seguir en directo pola canle de YouTube e a APP do RC Deportivo.
O triunfo (6-2) da pasada semana sobre o CD Juan Grande Ginelux, unido aos resultados do resto da xornada, deixou ás Nosas deportivistas en 3ª posición con 52 puntos, os mesmos que SD Eibar (2º) e CDF Osasuna Femenino (4º). Por detrás vén o Granada CF (5º con 49 puntos). Por diante, xa campión aínda que non pode ascender de categoría pola súa condición de filial, queda o FC Barcelona B (59 puntos).
Á mesma hora que o Dépor ABANCA, o Granada CF recibe á SD Eibar e o CDF Osasuna visita ao Cacereño Femenino. Co play-off xa no peto, varias combinacións colocan ás Nosas deportivistas a próxima temporada na máxima categoría nacional.
Fagamos cálculos e combinacións posibles para determinar se o RC Deportivo ABANCA é quen de levar o primeiro premio, o ascenso directo:
- Se o Dépor ABANCA gana e o SD Eibar empata ou perde, ascenderán as branquiazuis, posto que se tamén gañase o CDF Osasuna Femenino, un hipotético empate favorece ás coruñesas, que gañaron ambos os partidos ante as pamplonicas.
- Se o Dépor ABANCA empata e SD Eibar e CDF Osasuna Femenino perden os seus encontros.
- Se perden Dépor ABANCA, CDF Osasuna Femenino e SD Eibar, que o faría ante o Granada CF, provocaría un cuádruplo empate que tamén daría o ascenso ao equipo herculino, que suma 11 puntos ante eses rivais, por 8 das guipuscoanas, 7 das navarras e 6 das andaluzas.
O triplo empate entre Dépor ABANCA, CDF Osasuna Femenino e SD Eibar daría o ascenso ao conxunto vasco, xa que os resultados entre os tres equipos dan un novo empate a 7 puntos entre branquiazuis e azulgranas, que se resolvería a favor das segundas ao empatar en Abegondo e gañar en Unbe, do mesmo xeito que o empate simple entre deportivistas e armeiras.
Irene Ferreras comentou na rolda de prensa previa a esta última xornada de liga na Primera Federación Iberdrola que “xa tivemos dous días (en referencia ao mércores e ao xoves) para estar a barruntar sobre o que podía ser, o que se podía dar para que todo o mundo tivese claras as contas. A partir de aí xa non nos achega absolutamente nada estar a perder enerxía en que van facer uns ou outros. Temos que pensar en nós. Todo o que non sexa estar ocupado e concentrado no teu presente réstache rendemento. E esa é a parte máis difícil e máis importante”.
De feito, a adestradora deportivista Irene Ferreras comentou que en Logroño “non quero saber nada. Quero estar a vivir o partido, gozándoo como o que é, o último partido de liga. Cando chegue a noticia final imos estar xuntos para o bo e para o malo. O equipo está concienciado, tranquilo e esa é a maneira de conseguir o obxectivo”.
A convocatoria do Dépor ABANCA
Todo o cadro, que está en condicións de competir, viaxa a Logroño ademais de Paula Monteagudo, representante do conxunto filial deportivista.
“Agora mesmo daría igual como estivesen as xogadoras. É unha semana na que todas queren estar. Teño a todas dispoñibles e con moi boas sensacións. Onte (polo xoves) gocei dun dos mellores adestramentos desde o punto de vista colectivo porque vía a todas a un nivel moi alto. Iso ponme a min as cousas complicadas de cara a decidir o once pero faime respirar moita confianza porque as vexo moi ben, moi centradas”, apuntou Irene Ferreras ante os medios de comunicación nesa rolda de prensa previa ao partido do domingo en Logroño ante o DUX.
Todas #AsNosas, convocadas para a 30ª xornada de #PrimeraFederaciónIberdrola, o #DUXDéporABANCA de mañá ás 12:00 h. na Ciudad del Fútbol de Pradoviejo!
Tamén convocada toda #anosaforza (📺 https://t.co/QZVeDvLAIp y📱APP del RC Deportivo) pic.twitter.com/cEz5N1apNY
— RC Deportivo (@RCDeportivo) May 13, 2023
A ex deportivista Kika Moreno las filas do DUX Logroño
Pola súa banda, o DUX Logroño, no que milita a ex deportivista Kika Moreno, unicamente xógase tres puntos. O conxunto rioxano marcha 8º na clasificación con 42 puntos despois do seu empate a pasada fin de semana en Barcelona ante o RCD Espanyol (1-1).
No partido da primeira volta disputado en Abegondo o pasado 24 de setembro venceron as deportivistas (3-0) con tantos de Paula Gutiérrez, Ainhoa Marín e unha futbolista rival en propia meta.
Esta temporada no seu campo de Pradoviejo, o DUX gañou a Athletic Club B (5-0), UDG Tenerife B (2-1), CD Juan Grande Ginelux (1-0), Cacereño Femenino (2-1), Córdoba CF (4-1) e Real Oviedo (2-1); empatou con CD Alba Fundación Femenino (1-1), FC Barcelona B (2-2) e Rayo Vallecano (1-1); e caeu con SD Eibar (0-1), RCD Espanyol (1-2), Granada CF (1-2), SE AEM (0-2) e CDF Osasuna Femenino (0-3). En total, as rioxanas gañaron seis partidos, empataron tres e perderon cinco encontros.
Hoxe sábado 13 de maio non houbo actividade no campo para As Nosas. O cadro reuniuse unicamente na sala de vídeo ás 10:00 antes de subirse ao autocar rumbo a Logroño.
