Non puido ser. A fazaña que tiña po diante o Dépor ABANCA en Sevilla non se puido realizar, e cunha derrota ante o Real Betis por un 3-1 o equipo galego perde a categoría.
Despois dunha tempada de máis baixos que altos, as deportivistas din adeus á Primera Iberdrola, que a vindeira campaña será recoñecida como fútbol profesional. Contra todo pronóstico, as branquiazuis chegaron tocadas pero non afundidas a esta penúltima xornada, pero a milagre era demasiado grande e as coruñesas non puideron salvarse.
Primeira parte esperanzadora
Nos primeiros minutos de partido viuse sobre o terreo de xogo a un Dépor ABANCA enchufado. O adestrador Manu Sánchez volveu confiar no once que empatou ante o Granadilla na xornada anterior para iniciar o partido ante o Betis.
Nestas primeiras accións as deportivistas lograban xerar algo de perigo, cun córner tirado por Stephannie Blanco ou cunha internada de Athenea que acabaría en mans da gardameta andaluza. O acerto non sorría ás galegas, que porén seguían deixándose a pel no verde.
Pola contra, as verdibrancas si tiveron máis sorte. Cun centro ao segundo pau de Rosa Otermín, a galega Mari Paz Vilas viu a súa ocasión para rematar a pracer ante Sullastres e adiantar ao equipo local, que tamén precisaba vencer para salvarse.
Malia verse por debaixo, o Dépor ABANCA non tirou a toalla e seguiu presionando na zona dos tres cuartos de ataque. Aínda así, o conxunto herculino tiña problemas para xerar disparos e só materializou un de Blanco, que rematou en mans de Meline.
Peke, Alba e a propia Blanco seguíronno intentándoo sen éxito, mentres que o Betis salvávase de perder a unha xogadora cunha amarela non pitada tras un golpe de Mediana a Athenea.
Pouco antes do descanso, Ángela Sosa realizou un disparo nunha falta de Iris que tocaría en Peke para desviar a traxectoria, sorprendendo a Sullastres e subindo o segundo gol andaluz ao marcador.
A vasca tivo a súa oportunidade de anotar no minuto 40, tras un gran pase de Gaby frente a Meline, pero a porteira local soubo resolver a situación sen complicacións.
A falta de acerto castiga ao Dépor ABANCA
Na segunda metade Manu Sánchez deu entrada a Lía por Blanco en busca da remontada. As deportivistas presionaron desde o primeiro minuto, logrando crear ocasións como un centro chut de Athenea, que tocou en Gaby para atoparse finalmente coa defensa verdibranca. De novo a cántabra intentou estrear o marcador branquiazul, sen éxito.
Pola súa banda, o Betis xogaba en busca do terceiro tanto e este chegou unha vez máis gracias a Ángela Sosa. A falta de media hora para a fin do partido, a xogadora do club andaluz realizou un recorte no pico da área e cun disparo seco, raso e cruzado ao segundo pau puxo o 3-0, sentenciando o encontro e o futuro galego.
As futbolistas do Dépor ABANCA loitaron por anotar o gol da honra, que chegaría xa no tempo de desconto, no minuto 92. Unha contra conducida por Athenea e rematada por Peke fixo subir ao luminoso o único gol galego da mañá, rematando o partido nun 3-1 final.
Final do #RealBetisDéporABANCA no Felipe del Valle, final do noso primeiro capítulo en #PrimeraIberdrola!
Moita forza, tanta como orgullo d #asnosas ⚽️ #UnÚnicoLatido 💙 #razónDÉcorazón pic.twitter.com/aCdR86Hvp3
— RC Deportivo (@RCDeportivo) June 19, 2021
A vindeira fin de semana o plantel do Dépor ABANCA dirá adeus á Primera Iberdrola na última xornada, xogando en casa e ante a súa afección contra o Athletic Club.
FICHA TÉCNICA
REAL BETIS: Meline, Medina (Nana, min. 78), Ana González (Bea Parra, min. 83), Rosa Otermín (Aixa, min. 78), Rosa Márquez, Dorine, Paula, Ángela Sosa, Valle, Mari Paz (Abam, min. 78) e Altuve (Ana Hernández, min. 63).
DÉPOR ABANCA: Sullastres, Cris, Blanco (Lía, min. 46), Iris, Villegas (Helena, min. 77), Eva Dios (Bedoya, min. 66), Ainoa, Alba, Gaby, Peke e Athenea.
GOLES: 1-0 Mari Paz (min. 15); 2-0 Ángela Sosa (min. 38); 3-0 Ángela Sosa (min. 61); 3-1 Peke (min. 90+2)
ARBITRAXE: Rivera Olmedo (c. vasco). Amonestou a Ana González (min. 12), Medina (min. 21), Iris (min. 37), Altuve (min. 58) e Ainoa (min. 60).
INCIDENCIAS: Partido correspondente á 33ª xornada de Primera Iberdrola disputada no pavillón municipal Felipe del Valle (San José de La Rinconada, Sevilla).
