O Dépor ABANCA xa é equipo de Reto Iberdrola, pero aínda deberá pechar a tempada 2020/2021 coa última xornada. Esta desenvolverase a modo de despedida, tanto da categoría como da afección, cun encontro ante o Athletic Club. A última cita branquiazul terá lugar en Abegondo, este domingo, 27 de xuño, ás 12:00 horas.
O duelo desta xornada reunirá unha vez máis a equipo e afección, no que será un encontro de agradecemento mutuo e para dicir adeus á división de ouro.
Un rival de media táboa para despedir a tempada
A nivel deportivo, as branquiazuis deberán facer fronte ao Athletic Club, undécimo clasificado, con catro vitorias máis que as deportivistas e tamén dous empates máis.
As vascas conforman un equipo máis regular que as galegas, e malia estar na metade inferior da táboa, as albivermellas levan salvadas desde a xornada 29, cando venceron por un 2-1 á Real Sociedad.
No apartado anotador, o Athletic é superior ao Dépor ABANCA, cun balance negativo entre goles marcados e recibidos de 14 tantos, fronte aos 45 deporitivistas.
Aínda así, nos últimos cinco partidos, as galegas conseguiron amasar máis puntos. Dos últimos 15 puntos en xogo, as coruñesas sumaron cinco, mentres que as vascas só tres.
Posible reparto de minutos no Dépor ABANCA
Sen nada en xogo, Manu Sánchez poderá dar minutos ás menos habituais, no que será o último partido na máxima categoría, polo menos en un ano. As canteiras como Patri López ou María Figueroa, habituais nas convocatorias pero menos sobre o verde, poderán ter este domingo a oportunidade de ampliar os seus minutos na Primera Iberdrola.
Tamén poderá ter máis protagonismo Lía, unha futbolista importante para Sánchez, pero que pasou parte da tempada lonxe do Dépor ABANCA durante a súa estancia nos Estados Unidos.
No bando contrario, xogadoras asentadas no Dépor ABANCA como Athenea tiveron xa un protagonismo indiscutible ao longo da tempada. A dianteira cántabra foi neste curso unha das pezas máis importantes no debuxo branquiazul, e tras varias convocatorias coa Selección Española sub23 e a absoluta, todo apunta a que non seguirá vestindo de branquiazul na próxima campaña.
No resto do plantel as incógnitas sobre o futuro das futbolistas son múltiples. Non é así dentro do vestiario. Na última rolda de prensa dada polo adestrador, antes do partido ante o Real Betis que confirmou o descenso, Sánchez aseguraba que “a estas alturas case todo o mundo ten decidido ou encamiñado o que vai facer a próxima tempada e iso ocorre tamén aquí. As xogadoras, os axentes, os entornos, todo o mundo está a tocar a porta, é normal”.
No mesmo sentido, o técnico explicou que “aquí chama moita xente ás portas, algo bo teremos. Polo mesmo lado, hai moita xente que, se o resultado é o descenso, ten en moita consideración quedar aquí”. Algún destes nomes podería ser o de Peke, a máxima goleadora do equipo, que xa se expresou neste sentido nalgunha ocasión.
“Iso fala ben do proxecto, de toda a xente que hai ao redor do proxecto, de como se trata desde o club o proxecto feminino”, concluíu nesa rolda de prensa o adestrador.
Para o derradeiro partido do Dépor ABANCA, Sánchez contará coas seguintes xogadoras á súa disposición:
#AsNosas convocadas para a derradeira xornada desta temporada, a última, por agora, na #PrimeraIberdrola.
Mañá ás 12:00 h. na Cidade Deportiva de Abegondo: #DéporABANCAAthletic#TocaVolverseMollar ⚽️ #UnÚnicoLatido 💙 #razónDÉcorazón pic.twitter.com/MwEE015QaS
— RC Deportivo (@RCDeportivo) June 26, 2021
