A Reto Iberdrola complícase para o Dépor ABANCA. As deportivistas, invictas en Abegondo ata hai unhas poucas semanas, comezan a fraquear mesmo na casa. No último encontro, as herculinas recibían ao Seagull, penúltimo na clasificación, pero que foi quen de plantarlle cara ás segundas clasificadas e rabuñar un punto cun 1-1.
Malia a superioridade no verde do Dépor ABANCA, as xogadoras adestradas por Miguel Llorente cederon no tramo final do partido, encaixando o gol do empate e deixando de sumar os tres puntos tan necesarios para o ascenso. Co empate do Levante Las Planas ante o colista, o Sporting de Gijón, a loita polo liderado segue quente, coas líderes a tres puntos das galegas.
Superioridade branquiazul
Desde o pitido inciial, As Nosas colleron o control do encontro, dominando o xogo e obrigando ás visitantes a repregarse cara a súa portería.
Coa posesión ao seu favor, as branquiazuis gozaron das primeiras ocasións claras a través de Jone Ibáñez, María Ruiz, Patri López e Ainhoa Marín, unha das estrelas do plantel herculino, que ademais vén de renovar por tres tempadas máis.
Precisamente sería ela a autora do tanto deportivista, que subiría ao marcador no minuto 22 cun penalti cometido sobre ela mesma. Co paso dos minutos, o Dépor ABANCA deixou de crear perigo na área contraria, pero o balón seguía nos seus pés.
Na segunda parte, o Seagull pareceu espertar, comezando cunha gran ocasión de gol que Valles impediu que entrara na portería. Pola súa parte, as galegas apostaban pola banda dereita para as súas chegadas á porta contraria, pero o balón non entraba entre os tres paos.
A falta de media hora para o remate do encontro, Eva Dios tivo varias ocasións de aumentar o colchón das locais, mentres que as visitantes aumentaban a presión no ataque. Finalmente, no minuto 82 as xogadoras do Seagull lograron asinar o empate, cun tanto anotado por Chavero, quen sorprendeu á gardameta deportivista rematando un contraataque.
Co cronómetro en contra, o Dépor ABANCA loitou por recuperar a vitoria, pero os intentos do plantel de Miguel Llorente non chegaron a bo porto. O marcador non mudou e Abegondo repartiu os puntos, deixando ás coruñesas coa necesidade de volver vencer para seguir na loita polo liderado.
FICHA TÉCNICA
DÉPOR ABANCA: Ana Valles, Cris, Inés Altamira, Raquel García, Patri López, Carlota, María Figueroa (Laura Fernández, min. 58), Jone Ibáñez, Ainhoa Marín, María Ruiz e Eva Dios.
CE SEAGULL: Itziar, Ariza, Xenia, Jou (Mar, min. 81), Alcaide, Gordo, Julia (Cotado, min. 46), Galce (Blanca, min. 74), Nerea (Chavero, min. 67), Manau e Merino.
MARCADOR: 1-0 Ainhoa Marín, de penalti (min. 22); 1-1 Chavero (min. 82).
ARBITRAXE: Martín García Gómez (colexio galego). Sacoulle tarxeta amarela a Carlota (min. 2), Raquel García (min. 72) e Merino (min. 80).
INCIDENCIAS: Partido correspondente á 19ª xornada do grupo Norte de Reto Iberdrola disputado en Abegondo.
