A aposta polo fútbol galego no Dépor ABANCA é clara e así o demostran as dúas últimas confirmacións para o plantel da tempada 2021/2022. A ex xogadora do PM Friol, Goretti Neira incorporarase ao vestiario branquiazul, onde repite a canteira Patri López.
A coruñesa xogou durante cinco campañas no club lucense, as dúas últimas no Grupo Norte da Reto Iberdrola, o que a fai unha coñecedora da categoría onde competirá o propio Dépor ABANCA.
Con inicios vinculados ao Victoria CF herculino, a lateral Goretti Neira ocupa a posición de lateral esquerda.
Pola súa parte, Patri López continúa nos plans de Manu Sánchez. A de Melide cumprirá a súa sexta tempada como branquiazul, ao que chegou no 2016, debutando ante o Real Sporting de Gijón o 11 de setembro dese ano. Na 2017/2018 estivo cedida ao PM Friol.
Nos seguintes cursos, a futbolista alternou primeiro equipo e filial, sumando un total de 16 encontros en Primera Iberdrola, 27 en Reto Iberdrola e un no play off de ascenso. En total, anotou catro goles na segunda categoría.
Co primeiro equipo, a canteira adoita xogar como lateral, principalmente pola esquerda, como a súa nova compañeira coruñesa.