O Dépor ABANCA é líder do grupo norte da Reto Iberdrola. As coruñesas tiñan esta fin de semana o partido máis emocionante da xornada, que as enfrontaba co entón primeiro clasificado, Levante Las Planas. Facendo gala dun xogo propio e das súas señas de identidade, as coruñesas impuxéronse cun 3-0, facéndose coa primeira posición e pechando o 2021 por todo o alto.
Os goles branquiazuis non chegarían ata o tramo final, con dobrete de Ainhoa Marín e tanto de Jone Ibáñez para poñer fin a un encontro no que o Dépor ABANCA soubo lucirse ante a súa afección en Abegondo.
Primeira metade de tenteo
O Levante Las Planas chegaba a terras galegas coa seguridade que outorga ser o líder desde a primeira xornada. Como locais, as xogadoras adestradas por Miguel Llorente apostaron polo falar o seu idioma e desenvolver o seu propio xogo.
Así, nos primeiros minutos de partido a igualdade era patente entre ambos conxuntos, co esférico permanentemente no mediocampo e sen ocasións claras para ningún dos dous bandos. Como advertía o preparador na rolda de prensa previa, as herculinas puxeron as súas enerxías en manter unha posesión de balón superior, mentres que as visitantes agardaban a súa ocasión de atacar.
As primeiras oportunidades de gol tiveron acento catalán, con dúas ocasións de Nuria Garrote, a primeira mediado o ecuador da primeira metade e a segunda pouco antes do descanso. Na segunda, a porteira deportivista Ana Valles foi clave, actuando a tempo para atrapar a pelota que a xogadora rival tiraba.
Segunda metade branquiazul
O encontro reanudouse tras o descanso cun ritmo similar ao da primeira parte, con cada equipo metido no seu papel e mantendo un man a man constante. Con todo, desta vez as protagonistas nos ataques foron as deportivistas, cunha ocasión de Andrea Sierra que foi rozando a portería rival aos poucos segundos da reanudación.
Pouco despois, María Ruíz tamén tivo a súa tras unha excelente xogada individual, cun disparo que rematou en saque de esquina. Co córner, Jone Ibáñez apuntaría a porta atopándose con Sara Ezquerro no camiño.
Avanzada a segunda parte, a canteirana Aroa Guerra tivo dúas boas oportunidades. A primeira delas quedando soa ante a porteira catalá, tras un pase en profundidade de Sierra. Con todo, o seu xute marchou pola dereita da meta. Xa no 64. a xogadora do Dépor ABANCA estivo preto de lograr unha boa asociación con Ruíz, pero sen éxito.
A 15 minutos do final, as herculinas lograrían abrir a lata. Foi grazas a Ainhoa Marín, quen recibiu un centro de Carlota tirado á área pequena. A 14 do Dépor anticipouse á defensa e anotou o 1-0. Minutos despois, a propia Marín aumentaría a vantaxe branquiazul, cun novo gol no 81 recibindo de Inés Altamira.
Lonxe de contentarse co conseguido, as pupilas de Llorente querían máis. No minuto 85, Laura Fernández tivo dúas boas ocasións, a primeira cun man a man que foi a córner e a segunda nese mesmo saque de esquina.
Tres minutos despois, Marín puido anotar o terceiro, pero o disparo marchou alto pola meta catalá. Alejandra Serrano tamén tería a súa ocasión, pero o terceiro gol branquiazul foi obra de Jone Ibáñez xa no tempo de desconto e ante unha porta vacía.
Con este resultado, o Dépor ABANCA despide o 2021 como líder, con 31 puntos logrados en 10 vitorias e un empate. No balance de goles, as deportivistas suman 26 a favor por 7 en contra, sendo o mellor conxunto en termos defensivos.
Galería fotográfica
FICHA TÉCNICA
DÉPOR ABANCA: Ana Valles, Cris, Inés Altamira, Raquel García, Andrea Sierra, Paula Gutiérrez, Jone Ibáñez, Ainhoa Marín, Carlota (Laura Fernández, min. 77), María Ruiz (Alejandra Serrano, min. 89) e Aroa Guerra (Eva Dios, min. 67).
LEVANTE LAS PLANAS: Sara Ezquerro, Parera, Yasmin, Julia Mora, Esther Solà (Montse, min. 57), Letti, Julve, Nuria Garrote (Yosse, min. 63), Alberola (Olguita, min. 83), Irina e Mellado.
MARCADOR: 1-0 Ainhoa Marín (min. 75); 2-0 Ainhoa Marín (min. 81); 3-0 Jone Ibáñez (min. 90+2).
ARBITRAXE: Crespo Rodríguez (colexio galego). Sacou amarela a Nuria Garrote (min. 13), Andrea Sierra (min. 40), Yasmin (min. 41), Julia Mora (min. 45+1) e María Ruiz (min. 67).
INCIDENCIAS: Partido correspondente á 12ª xornada de Reto Iberdrola disputado en Abegondo ante 300 persoas.