O filial do Dépor ABANCA, o conxunto dirixido por Kevin Cabado ten un obxectivo en mente: estar no play-off de ascenso a Reto Iberdrola. E o primeiro reto está máis que conseguido. As branquiazuis golearon en casa cun 5-0 ao Real Oviedo B.
Desde o principio do encontro o conxunto herculino dominou os tempos e fíxose co control do balón. O primeiro gol non se fixo esperar demasiado, e Patri López foi a encargada de abrir a lata no minuto 7. Seguiuna Carlota no 23 e de novo Patri no 30.
O Oviedo destacaba máis polas faltas cometidas que polos acertos no verde, feito que aproveitaron as coruñesas para ampliar a súa renda. Na segunda parte do encontro, Patri completou o seu hat trick e un tanto de Eva Santamaría concluíu o partido.
O parón na Liga Iberdrola favoreceu ao Dépor ABANCA B, que recuperou a algunhas canteiras xa habituais nas filas do primeiro equipo ás ordes do adestrador de Manu Sánchez. Foi o caso de xogadoras como Eva Dios, Carlota ou Patri López.
Mentalidade de play-off no Dépor ABANCA B
O adestrador do plantel gañador, Kevin Cabado, destacou a actitude das súas xogadoras que tomaron este inicio de segunda fase “como un play-off, para elas era unha final, unha oportunidade moi bonita”.
O estreo con goleada foi ademais no campo 1 de Abegondo, o mellor escenario posible e ante a afección branquiazul.
“Saíu o plan de partido que deseñamos”, recorda Cabado sobre esta primeira xornada. “Coñecíamos moi ben ao Oviedo, xa xogaramos con elas o ano pasado nun par de ocasións e sabiamos onde podíamos facer dano. Creo que saíu o partido soñado, 5-0 ante o máximo favorito, pero non vai ser o máis habitual nas xornadas que quedan”, apunta.
