Desde este venres 23 ata o domingo 25, O Pompeo acollerá a fase de ascenso a Superliga Feminina 2 (SF2). O Club Voleibol Ourense (CVO) será o anfitrión desta fase final da Primeira División de voleibol.
A esta última parte da competición chegan os seis mellores equipos dos tres grupos nos que se dividiu a competición regular, entre os que se atopa o Aceites Abril CVO. Só dous deles poderán subir á categoría de prata.
O cadro ourensás, que tratará de facer do Pompeo o seu fortín, terá como rivais a dous equipos cataláns, un extremeño, un andaluz e un asturiano.
O sistema de competición polo ascenso a SF2
Esta fase de ascenso consistirá nunha liguilla dividida en dous grupos de tres equipos cada un. Neles todos xogarán contra todos na xornada do venres e o sábado pola mañá.
No grupo A competirá o anfitrión, o Aceites Abril CVO, o CD Badajoz e o CN Sabadell. No grupo B estarán o CV Sant Cugat, o CV Oviedo e o Club Albolote Granada.
Unha vez rematada esta primeira fase, os dous primeiros clasificados do grupo A enfrontaranse aos dous primeiros do grupo B en dúas eliminatorias directas o sábado pola tarde, dando lugar aos dous finalistas para a xornada do domingo. Os dous vencedores serán os equipos ascendidos á segunda categoría do voleibol español.
O aforo para esta competición estará limitado, seguindo as medidas restrictivas de capacidade en competicións deportivas. Desta forma, o máximo de asistentes estará en 60 persoas, que deberán seguir en todo momento os protocolos COVID-19.
O calendario da fase de ascenso
O venres, 23 de abril, terán lugar estes duelos:
- 10:00 horas: CV Oviedo vs Albolote Granada
- 12:00 horas: CD Badajoz vs CN Sabadell
- 17:00 horas: CV Sant Cugat vs CV Oviedo
- 19:00 horas: Aceites Abril CVO vs CD Badajoz
O sábado, 24 de abril, xogaranse estes partidos:
- 09:00 horas: CV Sant Cugat vs Albolote Granada
- 11:00 horas: Aceites Abril CVO vs CN Sabadell
- 16:30 horas: Quinto vs Sexto clasificado
- 18:30 horas: Semifinal 1
- 20:30 horas: Semifinal 2
O domingo, 25 de abril, disputaranse os últimos encontros:
- 10:00 horas: Terceiro e cuarto posto
- 12:30 horas: Final do torneo
- 14:00 horas: Entrega de medallas e trofeos
