Volve a Primera División de Honor de rugby e en Galicia o fai co CRAT Residencia Rialta estreandose en casa contra o Sanse Scrum. O partido será en Elviña, o domingo, 13 de decembro, ás 12:00 horas. O duelo promete ser de moita altura, entre dous rivais que, no forzado fin de tempada do curso anterior, contaban con 44 puntos, ocupando a cuarta posición as madrileñas e a quinta as galegas.
Ambos equipos, aínda que remataron con números moi parellos a tempada anterior, chegan en condicións non moi igualitarias. O que será o cadro visitante, ao ser orixinario de Madrid, comunidade que conta con máis clubs de rugby de alta competición, tivo xa a oportunidade de disputar algún amistoso.
Pola contra, o CRAT leva sen competir varios meses, polo que terá a desvantaxe de ter menos partidos de preparación. Por iso, o obxectivo que se marcan as coruñesas para esta primeira toma de contacto é a de xogar con orde e, segundo explica a adestradora, Helen Roca, “loitar de ti a ti neste encontro”.
Novidades en ambos equipos
Do lado das madrileñas do Sanse Scrum esta tempada terán, por primeira vez, competindo na máxima categoría á primeira fornada de xogadoras formadas integramente na Escuela y Academia del Sanse Scrum. Nas filas do sénior feminino, estarán nomes como Eloisa García, Itziar Salinas, Celia Esteban ou Alba Caballero.
Con todo, o seu xogo aínda é unha incógnita. O cambio no corpo técnico fai que o seu estilo de xogo cambie. A saída de María Ribera e o seu equipo técnico deixou así a porta aberta para a volta de Alfonso de la Cruz, quen xa dirixiu o sénior feminino no curso do 2018/2019. Ante esta incertidubre, Helen Roca explica que a súa estratexia será a de “tratalas como as coñecemos. Son xogadoras moi duras nos contactos, cunha loita moi forte nos puntos de encontro”.
Pola súa banda, Roca volve ao banco do CRAT para dirixir a un gran grupo de xogadoras. Máis de trinta conforman un plantel no que hai moitas veteranas e rostros coñecidos pola afección coruñesa como Paula Alevín Medín ou Mónica Castelo, pero tamén algunhas novidades como Maica Martí, Elena Martínez, Paula Requena, Paz Marín e Miriam Roig.
https://asnosas.gal/caras-novas-conecidas-pisaran-elvina-esta-tempada
Debut en casa e posible estreo das novas xogadoras do CRAT
Para o primeiro encontro de Liga, as coruñesas poderán contar coa calor da súa bancada. As galegas debutarán nesta tempada en casa, no campo de Elviña e, aínda que o partido será aberto ao público, as restricións da Universidade da Coruña limitan o aforo a 75 personas.
Unha cifra moi baixa para o CRAT. “Sempre dicimos que non vai ninguén a ver o rugby. Pero nos puxemos a facer o listado e faltan asentos. Entre non convocadas e políticas no palco, case non da para familiares e socias”, explica a técnico coruñesa. Está será unha das poucas oporunidades da afección para ver ao seu equipo na casa. O conxunto galego só xogará tres partidos na Coruña, e catro fóra. O apoio do público é vital e, por este motivo, a directiva do club tentará negociar que se amplíe o aforo.
Esta será unha oportunidade para que xogadoras como Maica Martí se estreen no céspede de Elviña ás ordes de Helen Roca. A nova incorporación chegou dunha lesión pero, en palabras da adestradora, “agora xa está a tope para empezar como titular esta fin de semana”.
A adestradora contará con todo o seu plantel á súa disposición para o esperado regreso á Liga Iberdrola. O CRAT non ten que lamentar baixas, aínda que “a única dúbida que tiñamos é cando van xogar coa Selección. Estivemos mirando que ningunha se lesionase no partido das Estrellas”, relata Roca.
A boa preparación física na que levan traballando desde hai meses, a pesar de non ter competido, debería bastar para que as lesións respeten ao equipo. “O único deste ano é ese medo que tes de facer test e que algunha dea positivo. Aí o efecto dominó sería fatal”, recorda a adestradora.
