A COVID-19 paralizou a competición para o CRAT, que aínda está recuperando encontros adiados debido á corentena que tiveron que pasar as coruñesas e ao temporal Filomena. Esta fin de semana é o turno do duelo contra o Cortevas Cocos Rugby, concretamente o domingo, 7 de febreiro, ás 12:00 horas.
Un duelo entre dous clubs moi recoñecidos no rugby español. O rival das galegas para esta fin de semana é o vixente campión da Liga Iberdrola. Previsiblemente, esta será unha proba para a futura competición dos play offs.
Unha vitoria e unha derrota no saldo andaluz
Tanto galegas como andaluzas estrearon a tempada cunha vitoria. No caso das primeiras, ante o Sanse Scrum e, no segundo, ante o Olímpico Pozuelo.
Porén, as sevillanas levan un balance dunha vitoria e unha derrota esta tempada, nos dous partidos das catro xornadas que puideron disputar. Tras o trunfo do estreo ligueiro chegou o primeiro aprazamento dun duelo, contra Les Abelles, correpondente á segunda xornada.
Para a terceira, as andaluzas tampouco poderon competir polo positivo detectado no plantel do CRAT. Xa na cuarta xornada, as Cocodrilas enfrontáronse ao Eibar Rugby Taldea, nun partido moi igualado, que se levaron as vascas por un 12-10.
O parón non freou ao CRAT
No bando galego, o CRAT Residencia Rialta non acusou o seu distanciamento forzado do campo, xa que á súa volta á competición venceron sen complicacións ao Olímpico de Pozuelo.
Malia ter preparado o encontro en só dous adestramentos, as pupilas de Helen Roca e Jos Portos demostraron o seu gran nivel no terreo de xogo e fixéronse co duelo.
Así, as herculinas levan un pleno de vitorias que as sitúan na terceira posición, empatadas a puntos co primeiro, segundo e cuarto clasificado. Dous postos por debaixo e con tres puntos menos están as andaluzas do Corteva Cocos Rugby.
Talento individual en ambos bandos
Para este encontro, citaranse xogadoras de moi alto nivel nas filas galegas e nas andaluzas. Nas primeiras, ademais das recentemente convocadas polas Leonas (Alevín, Mona Castelo e Requena), competirán tamén outras estrelas do CRAT.
Na primeira xornada destacaron María Vega, Alejandra Fernández e Maica Martí, quen xa foi Leona Iberdrola a tempada pasada, cando xogaba para o Crealia El Salvador. E no encontro da pasada fin de semana tamén repetiu entre as mellores Maica Martí, xunto con Ana Iglesias e Judith Hernández.
No bando rival, as xogadoras do CRAT deberán ter cuidado con Margarita Rodríguez, Jessica Arana, Lea Ducher ou Cristina Casas, autoras dos ensaios e transformacións que deron ás Cocodrilas a primeira vitoria.
O partido entre CRAT e as sevillanas poderá seguirse vía streaming no Youtube das Cocodrilas.
