A Liga Iberdrola de rugby volta tras o parón de Nadal, e o fai coa visita do CRAT Residencia Rialta ao Olímpico de Pozuelo o domingo, 10 de xaneiro, ás 12:00 horas na cancha das madrileñas.
O club galego chega en mellor posición ao choque, tanto polo nivel demostrado a tempada anterior como o que deixou ver a primeira xornada competitiva. Á fin do curso 19/20, as coruñesas do CRAT contaban con máis do dobre de puntos que as madrileñas, ás que gañaron no último partido no que se enfrontaron.
O CRAT chega con mellores sensacións
Foi na penúltima xornada ligueira, cando, como ocurre nesta ocasión, as galegas desprazaronse ata Madrid para disputar o encontro. Naquel entón as coruñesas gañaron ao Olímpico cun resultado de 22-34, pero que non foi suficiente para clasificarse no Top4.
No que respecta a esta tempada, as herculinas comezaron con moi bo pé, cunha vitoria ante o Sanse Scrum no primeiro partido da competición e en Elviña. Entre as filas coruñesas a protagonista foi Maica Martí, unha das novas caras que chegaron ao club herculino e que triunfou na valoración de medios e staff.
Podes revivir o primeiro partido do CRAT desta tempada nesta ligazón.
Non corre a mesma sorte o rival. As madrileñas visitaban ás Cocodrilas do Corteva Cocos, un dos equipos máis fortes da competición e vixentes campioas da Liga. En Sevilla, as do Olímpico sufriron unha contundente derrota 22-7, ante un rival que apenas lles deu opcións.
As agora locais loitarán por comezar de cero neste novo ano e lograr unha traxectoria mellor que a realizada o ano pasado, aspirando a estar na parte alta e sen sufrir pensando no descenso.
