- O CRAT Residencia Rialta pon fin á primeira volta hoxe domingo a partir das 12:00 h en Eibar.
O Campo de Unbe será o escenario deste último choque da primeira parte do calendario da liga Iberdrola onde as coruñesas queren e necesitan un triunfo. As sensacións agridoces desta tempada deixan un balance de dúas vitorias e catro derrotas polo momento, insuficiente para loitar polo título e perigoso para complicar a tempada na zona baixa da clasificación.
Eibar Rugby Taldea contaba os seus partidos por derrotas. Co bloque de xogadoras con máis estranxeiras do campionato, o seu esforzo en fichaxes non se estaba reflectindo nos resultados. O punto de inflexión puido ser a pasada xornada cando as armeiras conseguiron a súa primeira vitoria diante Complutense.
O CRAT Residencia Rialta visita agora ás guipuscoanas sabendo que unha derrota visitante igualaría a ambos os conxuntos. O encontro perdido en Elviña diante Majadahonda, aínda que dentro do previsible, rompía a fortaleza do CRAT Residencia Rialta como local e, se quere loitar polo título, debe empezar desde xa a gañar os seus compromisos fóra de casa.
As novidades son poucas. As lesionadas do CRAT Residencia Rialta seguen sen ser da partida. Á baixa para toda a tempada de Sina Hetet hai que sumarlle a de Estela. A valenciana regresa á súa terra por motivos persoais. Estela e Sina eran dúas xogadoras fixas no XV inicial no que vai de campaña e xa non estarán máis. E non hai fichaxes para cubrir as súas ausencias, polo menos por agora.
Jos, Pakito e Juan Carlos deberán sacar o mellor rendemento a un persoal que está capacitada para estar nos postos altos da táboa. Eibar Rugby Taldea é un bo destino para poñer terra polo medio cos lugares de abaixo e tratar de engancharse ás posicións de privilexio.
A próxima semana comeza a segunda volta e ao CRAT Residencia Rialta tócalle de novo ser visitante, esta vez ante un sorprendente Sant Cugat que leva catro vitorias consecutivas. É por iso que o CRAT está ávido por sumar catro ou cinco puntos se o bonus acompaña.
A convocatoria do CRAT
A convocatoria das coruñesas compóñena Pimi, Miri, Maria Morant, Leire Gorrotxategi, Rumi, Alba Lalín, Ceci, Maica, Maitane, Alevín, Quen, Judith, Anita, Alejandra, Tania, Selene, Valle, Ali, Jess, Kyra, Nicky e Elsa.
Comprobaremos se Maria Morant segue exercendo de número 8 diante a ausencia da neozelandesa Sina. Tamén haberá que despexar a incógnita do posto de defensora, un dos que máis inquilinas tivo esta campaña. Unha delas era Estela, que, como dixemos, tampouco estará. As ás son outras posicións nas que as coruñesas están a ter problemas coas lesións esta tempada.
O CRAT Residencia Rialta debe recompoñerse e sumar de novo unha vitoria para pechar a primeira volta na terna dos postos que dan acceso ás semifinais.
