As coruñesas do CRAT Residencia Rialta despiden o curso cun trunfo 25-15 ante o Lles Abelles que as sitúa na quinta praza con 21 puntos no seu haber ao remate da competición e invicto na segunda fase.
Último partido dunha tempada atípica para os conxuntos do CRAT Residencia Rialta e Lles Abelles que viñan de traxectorias opostas no Grupo 2 da segunda volta de Liga Iberdrola de rugby. As Coruñesas necesitaban a vitoria para asegurarse a quinta praza, pero Lles Abelles non llo ían a pór para nada sinxelo, xa que, aínda que chegaron á Coruña sendo pechacancelas e xa descendidas, coñecen perfectamente o que é gañar en Elviña. Fixérano xa ao derrotar ao CRAT Residencia Rialta na primeira volta da competición.
Comezou o partido moi favorable para as xogadoras que adestran o dúo de técnicos conformado polos adestradores Helen Roca e Jos Porto, que se mostraron claramente superiores nos primeiros compases de xogo. Un ensaio temperán na primeira xogada do partido, outro posterior e unha conversión a paus selaban un 17-0 no marcador ao descanso que facía xustiza ao visto sobre o campo.
O bloque do Lles Abelles sóubose repor na segunda parte para darlle a volta ao partido por completo. As valencianas desenvolveron un mellor xogo que as coruñesas na segunda metade e mesmo chegaron a porse a golpe dun ensaio transformado para empatar o partido.
Con todo, a pesar da melloría de xogo do conxunto visitante, o CRAT Residencia Rialta non perdeu a cara en ningún momento ao partido e mesmo nos peores momentos soubo xestionar a vantaxe coa que contaba (chegou a estar por diante 17-0).
Bo partido do CRAT Residencia Rialta que certifica a quinta praza na táboa clasificatoria nunha tempada atípica para todos os equipos na que as galegas medraron como bloque e se consolidaron de cara a futuras campañas. A súas cifras globais falan de ter asinado nesta campaña un total de seis vitorias, por tan só catro derrotas na súa conta.
O obxectivo exposto ao comezo deste curso 2020-2021 para o CRAT Residencia Rialta era o crecemento como equipo. No club eran conscientes de que estabamos ante unha campaña de transición e de afianzamento do grupo. Ao incorporar numerosas xogadoras moi novas e de longo percorrido esa era a meta e este cumpriuse con fartura augurando un futuro prometedor nas próximas campañas para o equipo que adestra a dupla conformada por Helen Roca e Jos Porto.
FICHA TÉCNICA
CRAT RESIDENCIA RIALTA (25): Miriam Roig, Paula Burillo, Maica Martí, Iria Anidos, María Vega, Maitane Buján, Alicia San Martín, Mónica Castelo, Alba Lalín, Jess Martín, Elsa Porto, Paula Requena, Paz Marín e Yanca Almeida. Tamén xogaron: Divi Leis, Bárbara Murillo, Carla Mosquera, Ana Montero, Ana Iglesias, Marina González e Tania Martínez.
C.P. LES ABELLES (15): Marie Michaud, Irene Noguera, Leyre Bianchi, Alejandra Marina, Fanny Gómez, Anael Fernández, Alicia Ahuir, Andrea Petru, Gloria Pérez, Jordan Heil, Tania Cifuentes, Laura Piera, Lieve Stallman, Ester López e María Borja. Tamén xogaron: Sara Tortajada, Lucía Abellán, María Ubeda, Alma Chornet, Carla Ferrando e María Benlliure.
MARCADOR:
Min 1; 7-0 Ensaio de María Vega transformado por Alicia San Martín
Min 20; 14-0 Ensaio de Paula Requena transformado por Alicia San Martín
Min 33; 17-0 Golpe de castigo transformado por Alicia San Martín
Min 45; 17-5 Ensaio de Lucía Abellán
Min 52; 22-5 Ensaio de Jess Martín
Min 68; 22-10 Ensaio de Jordan Heil
Min 76; 22-15 Ensaio de Irene Noguera
Min 79; 25-15 Golpe de castigo transformado por Anita Iglesias
ÁRBITROS: Luis Fernández. Expulsou temporalmente a Alba Ruibal do CRAT no minuto 19 por falta reiterada de equipo, tamén a Yanca Almeida no minuto 67 por xogo sucio.
INCIDENCIAS: Último partido da tempada da Liga Iberdrola de rugby Grupo 2 disputado nos terreos de xogo da USC en Elviña (A Coruña).
