No próximo curso, o CRAT Residencia Rialta competirá unha vez máis na Liga Iberdrola, e o fará con cinco novas xogadoras. Ao club galego chegan Selene Jiménez, Ceci Huarte, Estela Salinas, Leyre Bianchi e Marina Galán.
Cinco incorporacións que aportarán talento e xuventude ao equipo herculino, que busca nelas a xogadoras que se incorporen “con vistas a permanecer durante varias tempadas e a medrar xunto co equipo, creando un proxecto duradero no tempo”, indican desde a entidade.
As novas fichaxes do CRAT
Selene Jiménez (1997): Será unha das novas fichaxes do club. Procedente do Cisneros, onde desenvolveu toda a súa carreira deportiva chegando a conseguir na 2020/2021 o dobrete de Liga e Copa da Raíña, a nova xogadora do CRAT entrou ademais no top de anotadoras da categoría. A súa posición natural é a de ala, aínda que tamén pode competir como zaguero se é preciso.
Ceci Huarte (1996): Os seus inicios estiveron vinculados ao Torrelodones Rugby Club da competición rexional madrileña. Hai tres anos, pasou á máxima categoría da man do C.R. Majadahonda, xogando no centro do campo. A súa experiencia amplíase coas súas participacións como internacional coas Leonas no Rugby 7. Chega á Coruña por motivos laborais, igual que Selene.
Estela Salinas (2003): Esta xove xogadora aínda non tivo a oportunidade de debutar en categoría nacional, pero ten xogado co Club de Rugby Universidad Católica de Valencia ademais de coa súa selección autonómica. Tamén foi Leona internacional co equipo sénior da modalidade de Rugby Olímpico.
Leyre Bianchi (1996): Esta xogadora chega ao CRAT con anos de experiencia como nacional e internacional en diversos equipos. O seu debut na primeira división chegou no 2016 da man do Sanse Scrum. Máis adiante, marchou a Inglaterra para xogar dous tempadas co Glucester Rugby. No 2020 volveu a Valencia para xogar na segunda liña de Les Abelles.
Marina Galán (1995): Con pasado como xogadora do Cisneros e do Sanse Scrum, Galán foi elixida varias veces entre as xogadoras máis destacadas da Liga Iberdrola, sendo a máxima anotadora no 2016. Tamén conta con internacionalidades como Leona no Rugby XV e no Seven.
