O accidentado inicio de tempada para o CRAT Residencia Rialta está rematando e esta fin de semana recuperará o último encontro que tiña adiado. O illamento das coruñesas impediu que a cuarta xornada se disputase segundo o previsto, polo que o partido ante o CR Complutense Cisneros celebrarase este sábado, 20 de febreiro, ás 16:00 horas.
Unha vez disputado este duelo, o CRAT xa estará ao día en canto a partidos se refire na Liga Iberdrola. O rival para esta xornada é un habitual na zona alta da táboa, e vello coñecido das herculinas.
Pola súa parte, o Cisneros está vendo os seus esforzos transformados en vitorias. Polo de agora, as rivais das coruñesas non coñecen a derrota.
Porén, ambos conxuntos teñen o hándicap de ver os seus planteis mermados. Os dous equipos teñen que facer fronte ás baixas por lesións, ás concentracións das Leonas coas seleccións e, no caso do CRAT, as dificultades das xogadoras estranxeiras para volver ao país.
‘Alevín’, Requena e Castelo, convocadas coa Selección XV Feminina
Segundo informan desde o cadro dirixido por Helen Roca e Jos Portos, independentemente das desvantaxes, o equipo saltará ao campo coa ilusión e concentración que as caracteriza e que merece un partido deste nivel.
Para acadar a meta fixada no CRAT, vencer ante este equipo é vital. Malia adaptarse á situación actual, as galegas seguen apuntando a estar entre os catro mellores conxuntos da competición regular.
Polo de agora, as coruñesas ocupan a cuarta posición, con 9 puntos, un posto por debaixo do Cisneros, con 13. O partido terá que disputarse a porta pechada, pero se retransmitirá vía streaming no Youtube do CRAT.
A Liga Iberdrola volve o 7 de marzo
Despois da recuperación desta cuarta xornada, os equipos de rugby da máxima categoría do deporte oval non volverán aos campos ata a fin de semana do 7 de marzo.
Esta é a data marcada para disputar a quinta xornada ligueira, que no caso do CRAT as enfronta ao CR Majadahonda un par de semanas despois do duelo ante o Cisneros.
