A tempada de Liga Iberdrola de rugby rematou hai cousa dun mes, pero o CRAT Residencia Rialta segue a pleno rendemento con varias competicións.
Nestas semanas, as coruñesas compiten na Liga galega, mentres prepraran tamén a Copa da Raíña 7s Iberdrola. Dous campionatos ben distintos, un en modalidade XV e outro en Seven, pero que manteñen o deporte oval en marcha na Coruña.
Con vistas ao futuro, a adestradora Helen Roca asegura que no club “sempre nos gusta estar o máis arriba que poidamos”.
O rugby non para
A participación do CRAT co seu equipo Emerging na Liga galega dálle a oportunidade ás xogadoras que desfrutaron de menos minutos na Liga Iberdrola de competir máis, segundo apunta Helen Roca.
“Ao final non foron tantas, porque tivemos tantas lesiones que tivo que xogar xente de rexional de titular case. O rendemento das xogadoras foi brutal”, recoñece a preparadora do CRAT.
O outro campionato á vista é a Copa da Raíña 7s, cuxa primeira sede disputarase na cidade da Coruña na fin de semana do 19 de xuño. Sobre ter a oportunidade de competir nun escenario tan especial, Roca admite que “polo menos a de casa queríamos levala”.
Helen Roca: “Se non tes xogadoras rápidas e con moito manexo é máis difícil. Non é como o XV, que é máis en conxunto, que se tapan as carencias unhas as outras”
Porén, o xogo no rugby Seven é moi distinto ao XV ao que están acostumadas moitas das xogadoras. Por este motivo, a adestradora asegura que “é máis complicado. Se non tes xogadoras rápidas e con moito manexo é máis difícil. Non é como o XV, que é máis en conxunto, que se tapan as carencias unhas as outras. En Seven non, como haxa algún fallo adeus. O noso obxectivo é ir a por todas na Copa de Seven”.
O CRAT compite no grupo B como cabeza de serie, e o fará ante Complutense Cisneros, o Olímpico de Pozuelo e o León Rugby Club. Este é o grupo “da morte”, xa que conta con máis participantes da máxima categoría.
O CRAT coñece xa aos seus competidores na primeira sede da Copa da Raíña
O CRAT loitará en casa por rematar na mellor posición para ter uns emparellamentos favorables para a segunda serie, que se disputará en La Guinardera (Sant Cugat) entre o 26 e o 27 de xuño.
Helen Roca mira á seguinte tempada
Despois do verán, o equipo coruñés afronta outra tempada na elite do deporte oval, coa idea clara de que “sempre nos gusta estar o máis arriba que poidamos”.
Unha liña de pensamento que Helen Roca mantén “adestre o equipo que adestre”. A meta da entrenadora é “intentar conxuntalas para que cheguen o máis arriba posible”, pero sempre tendo en conta que “non podes poñer a barra moi arriba, porque ao mellor xogan incríble pero perden puntos e afúndense. O que imos intentar é que elas vexan que van evolucionando. Conseguir chegar a un bo nivel en Liga Iberdrola é ter menos fallos, poñendo obxectivos máis cuantificables, que é o que faremos o ano que vén”.
O CRAT ten as portas abertas
No relativo a posibles fichaxes, a adestradora asegura que virá xente “que quere vivir na Coruña porque a calidade de vida aquí é unha pasada” e ademais quere xogar ao rugby.
“Mola porque estás aquí e de repente veñen catro ou cinco persoas que veñen por traballo ou que pasan de estar en Madrid ou polo que sexa e acolleremos a algunha delas”, explica.
Roca admite que “non ficharemos neozelandesas, senón que será xente como a de aquí, que xogan a rugby, que está por aquí preto. Imos intentar conxuntarnos e que as que competiron este ano medren máis e cada vez melloremos máis e podamos ser máis competitivas”.
Helen Roca: “Decidimos apostar por xente xoven e para nós a aposta foi fructífera”
O nivel no CRAT non é baixo, pero a preparadora considera que aínda non chega á esixencia da Liga Iberdrola: “Moitas aínda non teñen a cabeza para estar concentradas todo o partido e logo eses erros acarrean partidos perdidos”.
O conxunto do curso 2021/2022 será unha mistura entre xogadoras que progresan no club e novas caras. O equipo coruñés quere seguir medrando coas súas, tal e como indica Roca: “A nosa intención non era fichar, senón manter o que temos e as que veñen o fan porque veñen a vivir e queren seguir xogando ao rugby. E nós abrimos as portas do club encantadas “.
