Por primeira vez en cinco anos, o CRAT Residencia Rialta non loitará polo título. Desde esta fin de semana, as coruñesas deberán defender o seu posto na máxima categoría. O primeiro duelo será ante o Sanse Scrum, este domingo día 25, ás 12:30 horas.
Este será o primeiro reto de tres (e único desprazamento) a superar para lograr a permanencia na Liga Iberdrola. O CRAT parte como favorito do grupo, non só pola súa veteranía, senón tamén pola puntuación. As coruñesas son primeiras con nove puntos.
Porén, o grupo polo descenso está moi igualado. O rival deste domingo, o Sanse Scrum ten sete puntos. Por riba deles está o Olímpico de Pozuelo, con oito e na última posición Les Abelles, con 4.
Podes seguir o partido en directo vía streaming aquí:
Para esta primeira xornada, Helen Roca e Jos Portos recuperarán á inglesa Masie James, que por problemas derivados da COVID-19 non puido xogar co CRAT desde antes de Nadal.
Na primeira fase da competición, as galegas xa lograron vencer ao Sanse Scrum por un 17-10, polo que parten cos números ao seu favor. Malia isto, todo é posible, e o club herculino non pode fallar.
