O CRAT Residencia Rialta quedou fóra do podio do GPS 7s Copa da Raíña Iberdrola, finalizando na cuarta posición da competición. As coruñesas conseguiron o pase ás semifinais na sede celebrada en Sant Cugat, pero caeron derrotadas ante o Rugby Turia na loita polo bronce.
As galegas pasaran á xornada do domingo como cuartas (segundas no grupo C) e coa vista posta en competir polo título copeiro. Antes, na sede celebrada na Coruña, as herculinas foron as mellores do seu grupo, subindo á terceira posición.
O equipo do CRAT superou no primeiro partido do domingo ao Eibar, no encontro de cuartos de final, nun duelo rifado, cun 17-14 final. A vitoria chegou grazas aos ensaios de Claudia Barro, Jessica Martín e Ana Iglesias e unha transforamción de Iglesias.
Nas semifinais, o conxunto de Helen Roca e Jos Portos as coruñesas enfrontábanse ao posterior campión, o Complutense Cisneros, que se impuxo por un claro 36-10, nun partido con dous ensaios galegos, de Ana Iglesias e Judith Hernández.
Con este resultado, o CRAT só podía aspirar xa á medalla de bronce. O rival neste partido foi o Rugby Turia, quen xa resultara perdedor no encontro celebrado no Campus de Elviña. Desta vez, as contrincantes foron claramente superiores ás herculinas, controlando todo o partido que resultou nun 34-7, cun solitario ensaio e transformación de Jessica Martín.
Na final da Copa da Raíña 7s, o Complutense Cisneros alzouse co título de campión da modalidade olímpica por primeira vez na súa historia, superando ao Majadahonda cun 19-12. Con esta coroa, as madrileñas consiguen o dobrete, tras triunfar tamén na Liga Iberdrola.
