A primeira serie da Copa da Raíña 7s Iberdrola celebrarase en A Coruña e xa ten os seus grupos confeccionados. O CRAT Residencia Rialta será o club anfitrión en Elviña e o cabeza do grupo B, ao ter entrado no podio da edición do 2019.
No torneo coruñés, os doce clubs participantes (entre eles o CRAT) loitarán por rematar na mellor posición, non só para sumar unha cantidade de puntos positiva para a clasificación final, senón tamén para ter uns emparellamentos favorables para a segunda serie. Esta terá lugar en La Guinardera (Sant Cugat) entre o 26 e o 27 de xuño.
Gañar unha destas series outorga 22 puntos para a clasificación xeral, mentres que o subcampión engadirá 19 puntos ao seu casilleiro e o terceiro 17. Entre o cuarto e o duodécimo clasificado repartiranse entre 15 e 1 puntos. O colista ao término das dúas roldas descenderá de categoría.
O grupo do CRAT na Copa 7s
Nesta parte inicial da competición as coruñesas xogarán no Grupo B contra o Complutense Cisneros, o Olímpico de Pozuelo e o León Rugby Club. Este último equipo debuta no trofeo da Copa 7s no que é o “grupo da morte”, xa que as galegas do CRAT e os outros dous conxuntos competiron esta tempada na Liga Iberdrola, a máxima categoría.
O CRAT, campión na tempada 2010/2011, loitará por volver a ser campión copeiro. A última edición, celebrada no 2019, deixou ao Majadahonda como triunfador.
Por outra parte, o Grupo A estará formado polo propio Majadahonda como líder do grupo, o CR Sant Cugat, anfitrión da segunda serie, o Rugby Turia, novo equipo de División de Honor B, e o Avia Eibar, nos play offs polo título de División de Honor na súa primeira participación.
O terceiro grupo, o C, ten ás Dragonas do XV Hortaleza como cabeza de grupo. O resto de participantes son o Ingenieros Industriales Las Rozas e o Sanse Scrum, da segunda e primeira categoría respectivamente. O último equipo deste grupo é o Universidad de Sevilla, equipo especializado en sevens.
O Torneo Nacional Sevens Femenino Challenge tamén será en A Coruña
Durante a primeira serie da Copa 7s disputarase tamén en A Coruña o Torneo Nacional Sevens Femenino Challenge, no terreo de Acea da Má. O campión desta segunda categoría ascenderá á Copa da Raíña da vindeira tempada, como fixera o AVIA Eibar no 2019.
