A AD Cortegada respira tranquila. Xa ten a permanencia asegurada pase o que pase nas dúas últimas xornadas, pero o seu rival desta fin de semana aínda está en tensión. As galegas visitan ao Magec Tías Contra a Violencia de Xénero este sábado, 20 de marzo, ás 18:00 horas.
Deixándose a súa pel na casa e dando a sorpresa da xornada aprazada, o Cortegada foi capaz de gañar este mércores ao Celta Zorka Recalvi, que se atopaban completamente en racha. As de Vilagarcía foron quen de remontar o partido ante un dos mellores conxuntos do Grupo A da Liga Feminina 2.
O Cortegada sorprende en casa e supera a un Celta irrecoñecible (69-63)
Coa moral subida tras esta importantísima vitoria, as galegas viaxan ata as Canarias para seguir sumando puntos, pero co obxectivo conseguido.
Menos sorte teñen as que serán as xogadoras locais. O Magec Tías está medrando na competición para afastar o descenso, do que conseguiu escapar hai un par de xornadas.
Actualmente, as canarias ocupan a undécima posición, a só un punto do descenso, pero con posibilidades de salvarse. Dependendo de si mesmas, o rival do Cortegada tratará facer da súa pista un fortín no que loitar por ser un ano máis equipo de LF2.
Os triplos, punto forte do Cortegada
Atendendo ás estatísticas, a clave diferenciadora entre estes dous equipos, moi igualados polo demais, estará desde a liña de tres.
A AD Cortegada ten un porcentaxe de acerto desde o triplo de case un 30%, sendo superiores ás canarias neste aspecto (24,2%). As demais áreas fan prever un partido igualado, xa que o Magec Tías é algo mellor nos tiros de dous (44,2% fronte ao 42,5%), pero as galegas gañan en tiros libres (68,8% fronte ao 69,3%).
As estrelas galegas
Nas filas visitantes, algunhas das xogadoras máis destacadas son Sara Gómez, que é a máxima anotadora do club, e Patricia Vicente, cun 11,88 de media nas valoracións.
Desde o triplo María González é a mellor do Cortegada, con 37,5% de media de acerto, seguida de Zeltia Presas, cun 35,9%.
