Co impulso da vitoria, a AD Cortegada recibe en casa na 22ª xornada de Liga Feminina 2 ao Vega Lagunera Adareva Tenerife. O partido ante as canarias celebrarase en Fontecarmoa o sábado, 27 de febreiro, ás 19:00 horas.
A falta de cinco encontros para que remate a competición regular (seis no caso do Cortegada polo seu duelo adiado co Celta), aínda non está claro quen abandoará a categoría por parte do Grupo A.
Actualmente o colista é o Magec Tías, pero só dous puntos separan ás canarias das seguintes clasificadas. Con 26 puntos están tres equipos, entre os que se atopa o Cortegada, e con 27 hai outros dous. Desta forma, a falta duns 10 puntos por disputar, hai uns seis equipos que previsiblemente poderían rematar na última posición.
Cada trunfo vólvese aínda máis vital, polo que no equipo de Vilagarcía non poden fallar. Non o fixeron na xornada anterior, ante un rival a priori moito máis complicado.
As xogadoras agora dirixidas por Javier Nogueira foron superiores ao Extremadura Miralvalle Plasencia, o entón terceiro clasificado.
Esta foi a terceira vitoria consecutiva para as arousás, o que lles mereceu pasar de ser colistas a ocupar xa a undécima posición e ser o equipo en mellor forma da metade inferior da LF2.
Pola contra, con cinco puntos máis grazas ao seu equilibrio de dez vitorias por once derrotas, está o Adareva, acomodado na sétima posición. Un posto que non necesariamente mostra o seu nivel actual, xa que a pasada fin de semana caeron ante o Arxil, que viña de perder co colista.
O Arxil volve cunha derrota e unha vitoria da súa expedición ás Canarias
O Cortegada case vence na primeira volta
Para esta nova ocasión de vencer ás canarias, o Cortegada deberá tomar nota dos erros cometidos na primeira volta. A novena xornada cruzou ao Adareva na súa casa coas galegas, na que o resultado final foi de 67-62.
O mal inicio de partido condicionou totalmente o xogo visitante, que xa non se puido recuperar. O primeiro tempo foi dun contundente 21-9 para o Adareva e, malia que o Cortegada respondeu cun 8-23 no segundo asalto, a segunda metade do encontro foi completamente para as canarias.
O partido poderá seguirse vía streaming no Canal FEB.
Nova cara no Adareva
O rival das galegas conta cunha nova incorporación nas súas filas. Trátase de Evelyn Adebayo, o último reforzo para o xogo interior anario que chega para completar ao equipo de cara ao tramo final da tempada.
A británica chega procedente do Pacisa Alcobendas e no club amarelo alaban o seu podería físico, intensidade en defensa e valentía en ataque.
