Este mércores,. AD Cortegada e Celta Zorka Recalvi citáronse para recuperar a 17ª xornada, e coa vista posta nos dous puntos por motivos moi distintos. Cun sorprendente 69-63 final, a favor das de Vilagarcía, estas aseguran a permanencia mentres que as viguesas deberán seguir loitando polo segundo posto.
Atendendo á traxectoria dos dous equipos e as súas posicións na táboa, podía preverse un partido disputado, pero cun dominio celeste. E así foi durante a primeira metade, pero tras o ecuador do encontro, as locais deron un golpe na mesa para levarse o trunfo que as certifica como equipo de Liga Feminina 2.
Pola súa parte, o Celta perde así a oportunidade de depender de si mesmo para pasar á fase de ascenso na posición de prata, e disputará as últimas dúas xornadas pendentes da actuación do Ardoi.
Primeira metade igualada, co Celta por diante
Os primeiros minutos deixaron ver o partido esperado. Con dous equipos saltando á pistas cos seus quintetos habituais, e loitando cada balón polo que estaba en xogo. As visitantes, lideradas por Angela Coello, levaban a iniciativa, pero as locais, con Patricia Vicente ao fronte, seguíanas de preto.
Esta igualdade sobre a cancha sería permanente ao longo de todo o primeiro cuarto, o que fixo que as celestes só puideran levar unha vantaxe dun punto á súa fin (18-19).
No segundo cuarto, o Cortegada apretou desde a liña exterior, o que obrigou a Cristina Cantero a parar o cronómetro. O Celta xa ía catro puntos por debaixo, cando restaban seis minutos para o descanso, polo que as viguesas comezaron a ser máis agresivas e cunha maior intensidade lograron asinar un parcial 2-10.
Porén, o conxunto local non ía deixar que as celestes se fóran no marcador, polo que, dominando o rebote defensivo, mantiñan a un triplo de distancia ás de Cantero (36-39).
O Cortegada tomou o control na segunda parte
Coa posibilidade de remontar o partido a un tiro de pedra, a AD Cortegada saíu concentrada de vestiarios, disposta a dalo todo. O acerto anotador desde a liña de tres do equipo local nos primeiros minutos da segunda parte foi clave para mudar o equilibrio de poder.
Dous triplos de Sara Gómez daban esperanza ás de Vilagarcía, dándolle a volta ao resultado e colocando ás locais por diante. No bando rival, o Celta aferrábase á liña de tiro libre para manterse dentro do partido e volver a adiantarse. Pero un parcial 5-0 para as de Nogueira antes do cuarto final marcaba as distancias (54-51).
Con todo por decidir, o cuarto parcial comezou cun pulso entre ambos equipos, e a igualdade reinando no electrónico. Co axustado 58-57, Cristina Cantero decidiu pedir un tempo morto que xurdiu o efecto contrario.
A xa débil defensa celeste permitiu que Sara Gómez marcase un triplo para o Cortegada, e na seguinte xogada as visitantes cometeron unha falta antideportiva intentando cortar un contraataque.
Coa seguinte acción de Sedlakova, as de Vilagarcía creaban un colchón de puntos respecto ás viguesas, cun electrónico que xa marcaba o 64-57. Un triplo de Motley devolveu a ilusión ás filas celestes, pero a reacción non chegou a tempo e o conxunto azulón levábase os dous puntos (69-63).
Con esta vitoria, a AD Cortegada ten asegurada a súa permanencia.
FICHA TÉCNICA
69) AD CORTEGADA: Patricia Vicente (13), Sara Gómez (15), Zeltia Presas (9), Cristina Loureiro (3), Tereza Sedlakova (12) – quinteto inicial -. Tamén xogaron: Lorena Castro (-), Miriam García (5), María G. Centeno (2) e Mercy Wanyama (10).
63) CELTA ZORKA RECALVI: Mariona Martín (-), Celia García (13), Rose Marie Julien (5), Angela Coello (12), Marita Davydova (10)– quinteto inicial -. Tamén xogaron: Ainhoa Lacorzana (4), Noa Comesaña (2), Lucía Fontela (2), Florencia Niski (-), Adrienne Motley (13) e Maja Stamenkovic (2).
PARCIAIS: 18-19, 18-20, 18-12 e 15-12.
ÁRBITROS: Manuel Andrés Seijo Vázquez e Iván Escariz Torres. Sinalaron 13 faltas a A.D. Cortegada e 17 faltas a Celta Zorka Recalvi.
INCIDENCIAS: Partido correspondiente á 17ª xornada do Grupo A da Liga Femenina 2 disputado no pavillón de Fontecarmoa, en Vilagarcía.
