A AD Cortegada está a saír a pulso do pozo da Liga Feminina 2. As de Vilagarcía ocupaban a posición de colistas hai tres semanas, e despois de tres vitorias consecutivas ocupan xa a undécima posición. O último destes trunfos certificouse ante o Extremadura Miravalle Plasencia, nun partido dominado polas galegas e que rematou nun 50-54.
Sorprendendo ao equipo revelación. Así foi como as de Nogueira fixéronse con dous puntos importantísimos para seguir vivas e coleando na loita por non descender. A falta de cinco xornadas, son o conxunto en mellor forma da cola da LF2.
O Cortegada fíxose coa pista actuando como visitante
O Cortegada xógase moito e sábeno ben. Por iso non dubidou un momento á hora de competir na pista de Plasencia, onde saíu enchufadísimo desde o minuto 1.
Catro triplos de Centeno, Sedlakova e dous de Sara Gómez axudaban ás galegas a poñerse con facilidade por diante. Así remataba o primeiro cuarto, cun 5-20 que foi vital no resultado final.
Porén, o entón terceiro clasificado non ía baixar os brazos facilmente. No segundo parcial chegou a resposta local, que achegábase a pasos axigantados e fíxose con este cuarto, malia non coa suficiente diferenza para ter a remontada resolta. O descanso chegaba co 19-28 no marcador.
Tras o paso por vestiarios dous triplos da capitá do Cortegada e o acerto de Sedlakova encamiñaban ás galegas á vitoria, cando só pasaran tres minutos desde a reanudación.
O Miralvalle pisáballe os talóns constantemente ás de Vilagarcía, facendo que o último tempo chegase cun marxe moi axustado. No último cuarto as locais lograron a súa primeira vantaxe, dun punto (42-41), cando aínda quedaba case todo o parcial por disputar.
De novo, Sedlakova e Centeno situaron ás súas por diante, dándolle o tan necesario aire a un Cortegada que loitaba pola terceira vitoria consecutiva. Non sen sufrimento esta acabaría chegando, co tiro libre de Sara Gómez como broche final a outra extraordinaria actuación do plantel de Nogueira no momento máis relevante da competición.
FICHA TÉCNICA
50) EXTREMADURA MIRALVALLE PLASENCIA: Ainsa (4), Robertson (13), Morales (2), Weledji (10), Aghayere (29) – quinteto inicial -. Tamén xogaron: Cueva del Río (2), Moreno (-), Chagas (-), Sánchez (-).
54) AD CORTEGADA: Vicente (3), Sara Gómez (18), Loureiro (1), González (10) e Sedlakova (19) -quinteto inicial -. Tamén xogaron: Presas (-), García (-), Castro (-) e Wanyama (3).
PARCIAIS: 5-20, 14-8, 21-13 e 10-13.
ÁRBITROS: Acevedo e Grande.
INCIDENCIAS: Partido de baloncesto correspondente á 21ª xornada da Liga Feminina 2 disputado no pavillón Ciudad Deportiva de Plasencia.
