O AD Cortegada recibía en boa forma, en casa, a un rival de media táboa, o Vega Lagunera Adareva Tenerife, cunha xogadora no máis alto das MVP: Gnere Alima Dembele. Así, a superioridade da malí foi unha apisoadora para as galegas, que saíron derrotadas 69-80.
Un resultado que pon final á boa racha pola que pasaban as de Vilagarcía, que acumulaban tres vitorias e se perfilaban como o conxunto en mellor momento deportivo da parte inferior da táboa.
O Cortegada aguantou o que puido o arreón de Dembele
O xogo coral das galegas viuse completamente ensombrecido por unha xogadora individual do bando rival: Dembele. A baloncestista do conxunto tinerfeño foi a protagonista do partido, guiando ao seu equipo á vitoria.
Os primeiros minutos deixaron ver un duelo igualado, con ocasións para ambos conxuntos baixo o aro, pero cun ritmo favorecedor para o Cortegada. O plantel dirixido por Javier Nogueira aproveitaba a escasa intensidade defensiva para manterse dentro do partido e incluso colocarse por diante momentaneamente.
Entón, as canarias fixeron gala da súa superioridade e pisaron o acelerador, esixíndolle máis ás galegas. A isto engaiuse que nas filas do equipo de Vilagarcía tanto Patricia Vicente como María Centeno fixeron dúas faltas, trastocando os plans locais. Catro minutos en branco pasáronlle factura ás galegas, que remataron o primeiro cuarto en inferioridade, cun 14-17 no marcador.
Para o segundo tempo o Adareva saiu forte desde o primeiro momento, dificultando o xogo local de cara á canastra á vez que non perdoaba baixo o aro. Un parcial 2-11 marcou a tónica deste segundo cuarto.
Foi entón cando Dembele, fundamental en calquer partido das tinerfeñas, comezou a relucir. Aproveitando á súa máixma anotadora e a presenza física das súas xogadoras interiores, as visitantes abríanse paso no luminoso.
O Cortegada chegou a verse a 16 puntos de distancia das rivais. Non existía un punto na pista desde o cal a de Mali non soubera anotar, chegando ao descanso con 22 puntos ás súas costas. Porén, as galegas anotaron dous triplos consecutivos que mantiñan os seus ánimos para afrontar a segunda metade. O tempo de descanso chegou co 26-39.
Malia as dificultades que tiñan por diante, as xogadoras de Nogueira saltaron á pista tras o paso por vestiarios con ganas e enerxía. Subindo o nivel da defensa e con maior acerto cara o aro, as galegas apretaban o marcador e achegábanse perigosamente ás canarias.
O Cortegada aferrábase á liña de tres como a salvación ante unha espectacular Dembele. Os primeiros puntos das locais nesta segunda metade chegaron desde o triplo, cunha inspirada Zeltia Presas que poñía o electrónico no 43-49.
Pero xusto cando o cadro local rozaba o empate, reapereceu a africana nas filas visitantes para salvar o partido. As de Vilagarcía estaban xa a dous puntos (53-55), no momento no que comezou o segundo asalto de Dembele.
O conxunto dirixido por Nogueira non baixaba os brazos e seguía sendo a sombra dun Adareva superior, pero que non remataba o duelo. O 64-69 chegaba ao marcador cun triplo da ala pívot visitante, sendo a guinda dos seus 11 puntos consecutivos.
Finalmente, malia as oportunidades creadas polo Cortegada, a mellor xogadora da competición foi superior e levou ao Adareva ao trunfo, sendo responsable da metade de puntos do seu propio conxunto.
FICHA TÉCNICA
69) AD CORTEGADA: Patricia Vicente (13), Sara (11), María Centeno (7), Cris Loureiro (9) e Sedlakova (17) -cinco inicial-. Tamén xogaron: Zeltia (9), Lorena, Miriam e Wanyama (3).
80) VEGA LAGUNERA ADAREVA TENERIFE: Luque (12), Negrín (2), Ilunga (8), Ibáñez (6) e Dembele (41) -cinco inicial-. Tamén xogaron: Contino, Adebayo (9), Reynés e Expósito (2).
PARCIAIS: 14-17, 12-22, 27-19 e 16-22.
ÁRBITROS: Alonso e Martínez. Sinalaron 16 faltas ao Cortegada e 19 ao Adareva.
INCIDENCIAS: Partido de baloncesto correspondente á 22ª xornada da Liga Feminina 2 disputado no pavillón de Fontecarmoa.
