A fin da primeira volta da Liga Feminina 2 traía unha moi boa oportunidade para a AD Cortegada de vencer a un rival directo como para seguir escalando postos na táboa e alonxarse da zona baixa. Non foi así, e a décimo terceira xornada rematou con vitoria 84-78 para a Agrupación Deportiva Baloncesto Avilés que xogaba na casa.
Ambos conxuntos chegaban en condicións moi parexas, con 15 puntos no seu casilleiro e precisando unha vitoria que as manteña lonxe das posicións de descenso. Ademais, a AD Cortegada viña de dúas fines de semanas seguidas con dous partidos en cada unha, polo que aparte de loitar por vencer debían facer fronte ao desgaste acumulado.
Finalmente, non foron quen de conseguilo e caeron no último tempo ante a ADBA, cun 84-78 final.
O triple, o maior castigo da AD Cortegada
O inicio do partido serviu para ver a unha ADBA cómoda na súa pista e, sobre todo, desde a liña de tres, onde sumou ata seis nos primeiros dez minutos. O acerto desde o triple por parte das locais foi extraordinario e deixou descolocada á AD Cortegada, que tardou en reaccionar e perdeu o primeiro tempo.
Para o segundo cuarto, as xogadoras agora dirixidas por Javier Nogueira fixéronse co control do partido e foron reducindo distancias no electrónico cunha mellor actuación en ataque e freando ás rivais na defensa. No descanso o luminoso indicaba a vitoria pola mínima das asturianas, cun 40-38.
Tras a pausa, as galegas volveron á pista con moita forza e guiadas pola boa actuación de Patricia Vicente e Sara Gómez, que entre as dúas marcaron máis da metade dos puntos do seu equipo. No terceiro cuarto, o cadro visitante adiantouse grazas a unha canastra de Cris Loureiro, facendo que as de Vilagarcía gañasen confianza no campo.
Pero para os minutos finais, o acerto da ADBA desde o triple volveu ser decisivo. A falta de dez minutos, as galegas situábanse cinco puntos por diante, pero as locais en seguida déronlle a volta ao marcador. O acerto aplastante durante todo o encontro de Devon Brookshire, a MVP do partido tras 27 puntos (once deles desde o triple), foi determinante na vitoria local.
Outro motivo de celebración para a ADBA foron os cinco triples da asturiana Sara Fraile. Unha xogadora natural de Asturias non acadaba esta cifra desde hai cinco anos.
As galegas chegan á pausa de Nadal a tres puntos do colista, e coa mente posta no seguinte reto. Será ante o segundo mellor equipo da Liga, o Osés Construcción Ardoi, o 6 de xaneiro, ás 16:00 horas, en Navarra.
FICHA TÉCNICA
84) ADBA: De Sousa (12), Fraile (18), Martínez (6), Barbosa (19) e Brookshire (27) -cinco inicial-. Tamén xogaron: Guimaraes (-), López (-) e Velasco (2).
78) AD CORTEGADA : Patricia Vicente (20), Sara Gómez (23), Cristina Loureiro (7), Teresa Sedlakova (13) e Teodora Saric (10) -cinco inicial-. Tamén xogaron: Zeltia Presas (-), Miriam García (2) e María Centeno (3).
PARCIAIS: 25-18, 15-20, 15-22 e 29-18.
ÁRBITROS: Romina Marchiano e Adrián Pérez. Sinalaron un total de 16 faltas á ADBA e 19 á AD Cortegada. Saric, do Cortegada, foi expulsada por persoais.
INCIDENCIAS: Partido correspondente á décimo terceira xornada da Liga Feminina 2 disputado no complexo deportivo Avilés.
