O Cortegada afrontou o derbi das necesidades co CB Arxil como unha final. As locais eran conscientes de que neste cruce íalles media vida, e non é que as visitantes non estivesen nunha situación similar, pero o certo é que o conxunto de Nogueira afrontou o duelo entre galegas con moito máis ímpetu. Moitas das súas papeletas de manter a categorías estaban nesta cesta. E asumiron o reto.
Nada máis saltar á cancha a AD Cortegada que adestra Javier Nogueira deixou claro que ía a polo partido con todo. Fíxollo saber ás pontevedresas do CB Arxil que prepara Maite Méndez cun parcial de 7-0. Ao final do primeiro parcial as de Arousa estaba 11 puntos por diante (21-10).
O segundo cuarto foi máis igualado e meteuno no peto o CB Arxil cun (10-11) que deixaba o partido 31-21 ao descanso.
A reacción do CB Arxil chegou no terceiro cuarto. As pontevedresas chegaron a colocarse cun 34-31 no electrónico, pero non abondou.
No cuarto período as verdes toparon de fronte cunha seria defensa das de Vilagarcía e non puideron reducir a vantaxe das locais, ao contrario, quedaron por detrás no parcial 11-7. E o partido sentenciuse cun 58-40.
Merece mención a recente incorporación da AD Cortegada, Mercy Wanyama. A pívot africana amosou o seu potencial freando nas verdes a Foster cando tocaba. E anotando cando foi preciso. Foi, de feito, a xogadora con maior valoración do partido (15). A súa achega anotadora e a de Sedlakova foron significativas. Entre as dúas fixeron 28 puntos.
Con este trunfo a AD Cortegada achégase a un punto do CB Arxil, o Maristas Coruña e o Ulla Oil Rosalía. Catro conxuntos galegos xogándose a permanencia nun pano. O resultado desta fin de semana dalle o basket average ás de Vilagarcía de Arousa.
FICHA TÉCNICA
58) A.D. CORTEGADA (58): Patricia Vicente (10), Sara Gómez (10), Cris Loureiro (4), María Centeno (6) e Tereza Sedlakova (14)- quinteto inicial -. Tamén xogaron: Zeltia Presas, Lorena Castro, Míriam García e Mercy Wanyama (14).
40) C.B. ARXIL (40): Sara Castro (5), Carla Fernández (6), Noelia Masía (2), Cristina Díaz-Pache (5) e Heather Foster (7) – quinteto inicial -. Tamén xogaron: Violeta Crespo, Margarita Moreira (9), Natalia López (2) e Samra Omerbasic (4).
PARCIAIS: 21-10, 10-11 16-12 e 11-7.
ÁRBITROS: Elio Clavería Sánchez e Iris Díaz Feijoo. Sen eliminadas.
INCIDENCIAS: Partido correspondente á 19ª xornada da LF2 disputado sen público por mor das restricións a causa da COVID-19 no pavillón municipal Fontecarmoa de Vilagarcía de Arousa.
