Remata a tempada para a AD Cortegada, e o fará na súa casa, recibindo ao último clasificado e xa descendido ADBA (Agrupación Deportiva Baloncesto Avilés). Este último duelo celebrarase en Fontecarmoa o sábado. 27 de marzo, ás 19:00 horas.
As de Vilagarcía xa levan salvadas un par de xornadas polo que, con todo decidido, afrontan este último partido na Liga Feminina 2 con tranquilidade e sen presións. Será un partido para desfrutar do baloncesto e despedir unha tempada complicada, con altibaixos.
A AD Cortegada recibe a visita das asturianas da ADBA quen, tras perder ante o Arxil, confirmaron o seu descenso de categoría. Cunha serie de sete derrotas consecutivas, e 30 puntos obtidos en 5 vitorias e 20 derrotas, as de Avilés son as últimas clasificadas do Grupo A da LF2. Porén, as galegas están na novena, con 33 puntos, empatadas co Arxil.
Sara Gómez e Patricia Vicente, estrellas do Cortegada
Para este encontro, atendendo aos datos acumulados ao longo da tempada, as dúas xogadoras máis destacadas nas filas locais serán Sara Gómez e Patricia Vicente. Estas dúas xogadoras son as mellor valoradas do Cortegada, cunha media de 11,64 e 11,48 respectivamente.
A primeira delas foi tamén a máxima anotadora do último encontro do conxunto de Vilagarcía, no que perderon ante as canarias do Magec Tías. Neste encontro, Sara Gómez foi quen de sumar 15 puntos, pero a MVP do cadro galego foi para Tereza Sedlakova, que acumulou 11 créditos valorativos.
As asturianas foron superiores na ida
Malia a diferenza de categoría entre galegas e asturianas na próxima tempada, a ADBA xa foi quen de gañar ao Cortegada na primeira volta.
O partido de ida, celebrado en Avilés, foi un encontro moi igualado, xa na previa, na que os dous equipos empataban a puntos. As entón visitantes dominaron o segundo e terceiro cuarto, pero a remontada foi freada no último tempo, no que a Agrupación Deportiva Baloncesto Avilés (ADBA) asinou a vitoria.
Neste encontro, o triplo foi decisivo, cun 54% de acerto no bando local e só un 36% na AD Cortegada. En liñas xerais, este é un aspecto do xogo no que os dous clubs están máis igualados, xa que na súa media ambos rondan o 29%.
