Todo a Europa. Esa é a aposta do Conservas Orbe Zendal BM Porriño que ten diante de si facer historia. As galegas, adestradas por Isma Martínez, mídense na tarde do sábado ao Valur no partido de volta da final da European Cup. Na ida o resultado foron táboas (29-29). O título será, polo tanto, para as vencedoras deste cruce final e definitivo. O encontro dispútase a partir das 17:00 horas e será transmitido pola TVG.
O Conservas Orbe Zendal Balonmán Porriño xa está en Islandia para disputar a Final da EHf European Cup Women.
Mañá as 17:00 horas TODO os afeccionados estarán diante da pantalla para intentar que o noso equipo levante o primeiro título da competición europea. #aportadeeuropa pic.twitter.com/2aucCAXI3h
— Club Balonmano Porriño (@BmPorrino) May 16, 2025
O Conservas Orbe Zendal BM Porriño quedaba eliminado da fase final polo título na Liga Guerreras Iberdrola hai uns días diante do Atticgo BM Elche. Isma Martínez reservaba claramente as súas xogadoras chave para este encontro da European Cup contra o Valur. Facíase preciso dosificar esforzos ante o reto de poder ser campioas europeas.
O técnico das galegas declaraba en La Voz de Galicia que aspiraba a “levantar o título”. Así que… quen dixo medo?
Moito que gañar para o BM Porriño
As islandesas, sobre o papel, son favoritas. Por orzamento, por potencia física, por experiencia europea… Pero as galegas van con todo e a por todas.
Pouco que perder, moito que gañar. O Valur leva nas costas unha ducia de participacións europeas. Para o Conservas Orbe Zendal BM Porriño esta é a súa primeira vez na competición continental.
Con todo, o Conservas Orbe Zendal BM Porriño é un equipo en alza que chega nun bo momento a este encontro crucial e histórico.
🔥 Final en Islandia 🇮🇸 Euro Cup 🔥
⚔️ @valurhandbolti vs @BmPorrino
🌞 Mañá solleira que aproveitaron as xogadoras para coñecer a cidade de Reikiavik
🤾♀️ O adestramento será pola tarde pic.twitter.com/KoKjAehBCU
— En Xogo tvG2 (@EnXogo_tvG2) May 16, 2025
Boas locais contra grandes visitantes
As de Reikiavik están invictas no seu feudo nesta tempada 2024-25 na European Cup. Outro punto ao seu favor. Unicamente o DHC Salvia de Praga foi quen de arrincarlles un empate as islandesas na súa cancha. Foi nos cuartos de final.
A favor das galegas do Conservas Orbe Zendal BM Porriño está que como visitantes, nesta European Cup na que debutan, unicamente perderon unha vez. Foi contra do Bursca Buyuksehir BS na terceira xornada desta competición continental.
As máximas goleadoras da European Cup fronte a fronte
A máxima goleadora desta competición é, neste momento, a extremo deretita do Valur Anna Ásgeirsdóttir que asina 77 goles. Pero a segunda nesa lista de máximas anotadoras é Micaela Casasola, a lateral esquerda do Conservas Orbe Zendal BM Porriño que ten 65 tantos no peto. Certo é que chega a este partido decisivo con problemas no nocello.
Nin o Valur nin o Conservas Orbe Zendal BM Porriño gañaron nunca a European Cup. Para calquera dos dous sería a súa primeira Copa de Europa de balonmán feminino que levar ás súas vitrinas.
De feito, ningún conxunto de Islandia gañou nunca esta competición. Si o fixeron clubs españois como no 2024 fixo o Atticgo BM Elche (que acaba de eliminar ao Conservas Orbe Zendal BM Porriño da loita polo título na Liga Guerreras Ibedrola), o Rocasa Gran Canaria no ano 2022 ou o Rincón Fertilidad Málaga no 2021.
Agárdase que un cento de seareiras e seareiros acudan a acompañar ao conxunto galego en Reikiavik alentado ás vermellas nun partido que xá é histórico para o balonmán galego pase o que pase.
As finais xóganse con tanto cabeza como corazón, así que por moitos boletos que teña ao seu favor o conxunto islandés, as do Porriño tamén teñen boas cartas e sabe xogar a este xogo tan ben como as locais.
Todo está por decidirse. O soño está intacto e a gloria espera a quen consiga un gol máis e poida así erguer a copa de campioas de Europa.
O BM Porriño aposta todo a Europa, desde As Nosas apostamos todo ao vermello.
Ver esta publicación en Instagram
