Esta semana representantes do BAXI Ferrol, Rugby Ferrol e Abeconsa Basketmi reuníronse no Concello de Ferrol con representantes de todos os partidos presentes na corporación municipal para falar da actual situación do deporte na cidade departamental. Hoxe, venres 5, o concelleiro de Deportes de Ferrol, Antonio Golpe, presentaba a proposta de subvencións nominativas a entidades deportivas para este ano e explicaba: “O que pretendemos é que as entidades dispoñan da achega municipal o antes posible”.
Os representantes dos clubs citados deportivos da cidade expuxeron a situación que atravesa o deporte na cidade debido á situación derivada da pandemia de COVID-19. Derivada desta, subliñaron os problemas de financiación que teñen as entidades para poder rematar a tempada debido á falta de aprobación dos convenios deste ano.
Os portavoces de todos os grupos presentes, Julián Reina e o concelleiro de Deportes, Antonio Golpe, polo PSOE; Iván Rivas, do BNG; Martina Aneiros, do PP; e Suso Basterrechea de Ferrol en Común, expresaron o seu respaldo. Os políticos avogaron por aprobar con urxencia os convenios, unha vez se dispoña da documentación das propostas do equipo de goberno.
Previsiblemente os convenios de Ferrol aprobaranse o xoves 11
Despois de case dúas horas de reunión, chegouse ao consenso de que ao rematar a mesma, os demais grupos recibirían a documentación para revisala e tratar de chegar a un acordo na comisión de deportes do venres.
Unha vez pasado este trámite, o martes levarase á comisión de Hacienda e o xoves, día 11, aprobaranse os convenios nun pleno extraordinario.
Así foi o compromiso de todos os grupos municipais, que agradeceron aos representantes dos clubs presentes e que, como declaran desde o BAXI Ferrol, servirá de axuda para todo o deporte da cidade.
O propio grupo de goberno informou tamén de que xa se incorporaron os remanentes de tesouraría, polo que nos próximos días procederase ao pago do 50% dos convenios do ano pasado.
De feito, hoxe venres 5 de marzo, o concelleiro de Deportes de Ferrol, Antonio Golpe, destacou que o goberno local levará a listaxe ao pleno extraordinario do próximo xoves, 11 de marzo, “moito antes que en exercicios anteriores”. O documento contempla preto de 750.000 euros para repartir entre un total de 43 clubs.
Proposta de subvencións a entidades deportivas
O concelleiro de Deportes, Antonio Golpe, trasladou esta mañá aos grupos da oposición durante a comisión ordinaria de Cultura, Educación, Universidade, Deportes e Festas a proposta de anexo de subvencións para entidades deportivas, cuxo importe total ascende a 749.500 euros para repartir entre 43 entidades.
O edil de deportes destacou que o goberno local “fixo un importante esforzo” por adiantar este ano a data na que se presentan as subvencións, posto que nos últimos anos fíxose a finais de ano e este estamos a facelo en marzo”, dixo Golpe. “O que pretendemos é que as entidades dispoñan da achega municipal o antes posible”.
