Durante a fin de semana a piscina Rías do Sur de Pontevedra acolleu o Campionato Galego de Natación Alevín de Verán. Nel, o CN Galaico proclamouse campión da categoría feminina e da clasificación por clubs, cun segundo posto na masculina. O podio da clasificación xeral pecháronno o CN Ferrol e o CN Portamiñá.
En total, 191 nadadores citáronse na piscina pontevedresa, con 75 competidoras para as probas femininas. O campionato disputouse en dúas xornadas, con dúas sesións cada unha, mañá e tarde, realizando ata 30 probas.
Na competición feminina, o Galaico sumou 335 puntos, seguido polo CN Portamiñá de Lugo, con 250 e CN Ferrol con 219. Na xeral, o equipo pontevedrés acumulou 626 puntos, con 563 para as ferrolás e 408 para as lucenses.
O top 10 feminino
Tras o podio do CN Galaico, CN Ferrol e CN Portamiñá, outros sete equipos clasificáronse na metade superior da táboa das probas femininas.
O CN Rías Baixas quedou ás portas do podio, con 203 puntos. No quinto lugar a posición foi para o RCN Vigo, con 148 puntos. Na seguinte praza quedou o ourensán CN Pabellón, con 135 puntos. O sétimo lugar ocupouno o CN Riveira, con 120 puntos. Con cinco puntos menos, clasificouse o CN Ponteareas, e só tres puntos por debaixo quedou o Culleredo. A décima posición, con 90 puntos, foi para o CN Coruña.
O equipo cullerdense resaltou o “valor engadido destes resultados” despois dun ano intenso emocionalmente e duro a nivel deportivo, onde “víronse os froitos dun traballo diario do que estamos moi orgullosos e orgullosas”. Con só dúas nadadoras, o Culleredo acadou ata seis medallas: Carlota Feal obtivo o ouro nos 200 bolboreta, dúas pratas en 100 bolboreta e 800 libres e un bronce en 400 libres. Pola súa banda, Carla Cabana foi prata en 200 braza e bronce en 100 braza.
