O Club Waterpolo Pontevedra continúa traballando a pesar de non contar aínda con datas para retomar as competicións autonómicas.
“Xa son nove meses os que leva a entidade pontevedresa sen disputar partidos de waterpolo, pero a pesar da incerteza de cando poderán volver xogar, os diferentes equipos do club continúan adestrándose desde que no mes de xullo puideron volver á auga. E fano cun estrito protocolo de seguridade anti-COVID, adaptándose ás circunstancias para adestrar sen contacto e con distanciamento”, explican desde a entidade pontevedresa.
Desde benjamines até senior, o Club Waterpolo Pontevedra conta con case un centenar de deportistas que cada semana adestran 3 ou 4 días nas piscinas do Centro Galego de Tecnificación Deportiva e do Complexo Deportivo Rías do Sur.
Coa esperanza de volver xogar en 2021, os diferentes equipos do club están a demostrar o seu gran compromiso e dedicación a este deporte, adestrándose co obxectivo de manterse cunha boa condición física á vez de seguir mellorando tecnicamente para que cando chegue o ansiado momento de volver xogar partidos, chegar nas mellores condicións posibles.
Captación de deportistas con xornadas de portas abertas
O club pontevedrés quere aproveitar estas datas para “continuar captando adeptos, polo que durante todo o mes de decembro e en xaneiro, fará xornadas de portas abertas para que deportistas que queiran probar o waterpolo poidan facelo sen compromiso”.
As xornadas de captación estarán destinadas a nenos e nenas desde 8 a 13 anos, ampliándose ás mozas para calquera idade. Os e as interesadas poderán contactar por correo electrónico (info@waterpolopontevedra.com), por teléfono (604 002 018) ou en calquera das súas redes sociais (páxina web, facebook, instagram ou twitter).
Unha vez solicitada a información, desde o club informarán de que días/horarios poderán acudir á piscina e liquidar calquera dúbida.
A solidariedade mantense no Club Waterpolo Pontevedra
E para manter algunha tradición do Nadal do club, a pesar de non poder celebrar a cea do Nadal de todos os anos nin os partidos de vellas glorias e pais-nais, o Club Waterpolo Pontevedra manterá a súa faceta solidaria e continuará colaborando coa Fundación Amigos de Galicia. Pero este ano de forma diferente, xa que non está permitida a doazón de produtos alimenticios.
O Club recadará diñeiro a través dos seus socios/as e amigos para doar á asociación, polo que anima a quen queira achegar o seu granito de area, coa cantidade que queira ou poida, facendo un ingreso na conta do Club Waterpolo Pontevedra, entre o venres 18 e o xoves 24 de decembro co concepto “Doazón Amigos Galicia”.
