A concelleira de Deportes do Concello da Coruña, Mónica Martínez, recibiu esta tarde (martes 22 de decembro) no pazo municipal de María Pita a unha representación do Club Halterofilia Coruña. Á cita acudiron, entre doutros, o adestrador do equipo Ferenc Szabo, así como destacadas halteras coruñesas como Irene Martínez, Irene Blanco Tarela, Ruth Fuentefría ou Noelia García.
En nome do Concello da Coruña a responsable de deportes trasladaba ao equipo: “É un orgullo encher hoxe este Salón de Plenos de campioas e campións coma vós, aos que queremos agradecer e poñer en valor o voso esforzo, sacrificio e valentía que vos leva a sumar tantas medallas das que, co voso permiso, tamén presumimos como cidade”.
O Club Halterofilia Coruña ven de acadar éxitos como bloque pero tamén destacadas intervencións individuais en competicións como a Copa da Raíña de halterofilia (o CH Coruña foi terceiro) e a Copa do Rei (o CH Coruña foi segundo), celebradas na Coruña, que foi tamén Campionato de España de clubs.
Na proba, Irene Martínez acadaba a segunda mellor marca individual de todo o campionato e Irene Blanco establecía un novo récord de España júnior na categoría de peso corporal de 87 quilogramos na modalidade de dous tempos ao levantar 120 kgs.
Tamén nesta tempada, o Club Halterofila Coruña acaba ouros no Campionato de España Absoluto celebrado no Pavillón San Francisco Javier da cidade herculina. En concreto, Irene Blanco asinaba tres ouros (90-100-190) e Irene Martínez ouro en arrancada (90kg), prata en dous tempos (100kg) e ouro no total olímpico con 190 kg.
As halteras galegas brillan no Campionato de España Absoluto celebrado na Coruña
O Club Halterofilia Coruña manda no Campionato de Galicia Absoluto e Junior 2020
