O club Aguamarina volve con éxito do Trofeo Copa Deputación de Ourense. O equipo cullerdense proclamouse campión na categoría júnior, onde tamén obtivo unha prata, e sumou outra medalla en infantil, obtendo un bronce. O conxunto anfitrión, o Sincro Ourense, tamén triunfou en casa, con dous ouros, en benxamín e prealevín, unha prata, en infantil, e un cuarto posto en júnior.
Esta foi a primeira competición por rutinas da tempada, que nesta edición foi aínda máis especial. A proba foi tamén o primeiro campionato disputado desde o comezo da pandemia. O torneo levouse a cabo na piscina Rosario Dueñas, no complexo polideportivo dos Remedios, seguindo os protocolos correspondentes, polo que as nadadoras notaron a falta do público na bancada.
A adestradora do Aguamarina, María Costoya, declarou tras a competición que esta vitoria “serve de motivación para dalo todo no Campionato Galego”, previsto para o vindeiro domingo nas instalacións do Real Club Náutico de Vigo.
O propio Concello de Culleredo quixo felicitar ao club da localidade cunha mensaxe: “queremos felicitar a todos os estratos do club despois dun ano tan complicado. Agardamos que este gran resultado colleitado sirva de revulsivo para todo o que queda por vir”.
Tamén obtiveron medallas, ademais do Aguamarina e o Sincro Ourense, equipos como o Sincro Rías Baixas de Vigo e o Acuatic Oleiros.
