O clásico xógase en Vista Alegre

Case un ano e medio despois volve o clásico do futsal. Pescados Rubén Burela FS e Futsi Atlético Navalcarnero volverán verse as caras mañá e será de novo en Vista Alegre, desde o último encontro ligueiro 2019-20 antes da pandemia.

“É un partido que motiva a calquera, un partido que todo o mundo quere xogar”, afirma a Guerreira Laranxa, Jane. A 11 burelista declaraba que “medirse a Futsi sempre é un espectáculo; esperamos poder gozalo ata o final coa guinda dos tres puntos”.

O clásico da Primeira Feminina de fútbol sala chega á Bomboneira coa xornada 4 da segunda fase, en pugna polo play-off. A cita, prevista para as 18:30 horas, poderá seguirse en directo vía streaming por Burela FS.tv. A taquilla, con 50 entradas dispoñibles, abrirase ás 17.45 horas (15 euros para non socios/10 euros para socios sen abono).

Jane foi clave en anteriores clásicos

Nos anteriores encontros que enfrontaron a Burela e Futsi, a once laranxa foi unha peza importante do xogo de Julio Delgado. A futbolista marcou un triplete en Copa e un gol en Liga. “Sempre me alegro cando marco, pero o importante é axudar o equipo o máximo posible”, confesaba nesta liña.

Supercopa 2019 Futsi vs Burela con Jane / BURELA

Ambas as escuadras chegan ao gran duelo, o clásico, como de costume, con números envexables. Con 12 triunfos e 3 igualadas na primeira fase, o Burela custodia o liderado do Grupo C grazas ao pleno nestas 3 xornadas en busca do play off.

Futsi Atlético, pola súa banda, con 14 vitorias e 2 empates na anterior etapa, chocou contra a primeira derrota en moito tempo no arranque da segunda fase (3-4 ante Móstoles), recobrou forzas ante Alcorcón (1-6) e chegará con descanso da semana pasada, polo aprazamento con Melilla:

“Está a realizar unha excelente tempada, para nós non é unha sorpresa. É certo que chega coa recente derrota fronte a Móstoles pero creo que iso non vai influír”, explicaba a brasileira, moi emocionada coa cita.