O Pescados Rubén Burela FS pechará mañá a segunda fase de Primera División co Clásico como sentencia do liderado. As Guerreiras Laranxas visitarán a pista de Futsi Atlético Navalcarnero (La Estación, 18.00 horas), co propósito de arrebatar a primeira praza ás madrileñas para os play-off da loita polo título.
“É unha forma de acabar a fase regular ideal. É un partido que todo o mundo agarda, que todo o mundo quere ver, con connotacións diferentes porque o título non está en xogo, coma outras tempadas. Vai ser un partido no que os dous equipos imos ir máis confiados” adiantaba Sandra Buzón.
Sandra Buzón: “Traballamos moito, fomos moi regulares e estamos a cumprir cos obxectivos marcados a pesar das dificultades de lesións e confinamentos”
Para a 4 do Burela, “o balance está a ser moi positivo. Traballamos moito, fomos moi regulares e estamos a cumprir cos obxectivos marcados a pesar das dificultades de lesións e confinamentos”. O vestiario laranxa afronta este tramo final da competición con optimismo e motivación, froito das boas sensacións xornada tras xornada.
Xornada decisiva no grupo polo título
Nesta oitava xornada está case todo por decidir. Poio Pescamar defenderá a terceira praza ante Alcorcón, quinto e con opcións de clasificarse para o play-off; Roldán FS tamén terá que facer os deberes fronte a Móstoles en custodia da cuarta posición.
“É unha fin de tempada moi bonita, con moitas opcións para o título, tanto AD Alcorcón, Poio Pescamar e STD Roldán FS, disputándose unha praza, coma o primeiro posto que se decidirá no Clásico contra Futsi”, explicaba a santanderina, moi ilusionada cunha nova edición do espectáculo por excelencia para o Pescados Rubén Burela.
Terceiro Clásico para o Burela
Este será o terceiro cara a cara de madrileñas e galegas esta tempada, tras unha longa ausencia; o partido de liga foi para Futsi Navalcarnero (1-2) e a Copa para as mariñás (0-1): “En Vista Alegre, o gran protagonista foi o repecto despois de case ano e medio sen vernos. En semifinais de Copa de S.M. A Raíña, sendo unha eliminatoria pesou as ganas por non encaixar. Este encontro será máis bonito, verase máis a esencia de ambos” reflexionaba Sandra Buzón, aparcando polo momento a emoción da gran pugna: “Estamos desexando que chegue esa fin de semana, pero hai que ter a cabeza con Futsi. Xa haberá tempo para soñar polos play off”.
O equipo de Julio Delgado e Lucas partirá con rumbo a Madrid este sábado ás 8.30 horas. Peque non poderá participar co Burela por motivos médicos. A cita poderá seguirse en directo vía streaming a través de Football Planet Youtube.
