O reloxo inicia a conta atrás. O Cidade de As Burgas xógase o seu futuro, practicamente a todo ou nada, esta xornada. As ourensás compiten contra o Intersala Promesas este sábado, ás 17:00 horas, nos Remedios. Un duelo directo, que será vital neste tramo final da loita pola salvación.
As xogadoras de Manolo Codeso contarán co factor casa a favor para dalo todo nun partido do que depende a súa categoría para a vindeira tempada. Porén, a salvación non depende só delas. Quedan tres partidos en xogo nos que non poden fallar e, ademais, deben agardar que o Amarelle e o Esplugues perdan.
No bando contrario, o Interesala Promesas tamén compite a vida ou morte. No partido de ida, as futbolistas do Cidade de As Burgas salvaron un punto cun empate a ceros, mostra da máxima igualdade que se espera deste encontro.
Sobre a táboa, so 0,09 puntos de coeficiente separan a galegas e zaragozanas, unha diferenza explicada pola vitoria de máis que teñen as competidoras locais.
O Cidade chega con forza
Na última xornada, as xogadoras do Cidade colleron alento. As xogadoras que adestra o técnico galego Manolo Codeso competiron en terras alicantinas contra o Xaloc, e realizaron un 0-1 cun gol no último minuto de Amelia, que carga de esperanzas ao equipo galego.
Para esta nova xornada, Os Remedios terá que ser un feudo, no que as verdibrancas extendan a súa dinámica vencedora para volver a sumar tres puntos vitais a esta altura da campaña.
