O tempo esgótase na Primeira División de fútbol sala e o Cidade de As Burgas GLS ten xa poucos tiros na recámara para salvarse. Cun deles será complicado acertar na diana, xa que será ante o Futsi Atlético Navalcarnero.
Este é un reto maiúsculo para as xogadoras de Manolo Codeso, que visitan a un rival que ata a pasada xornada figuraba como o líder do Grupo A. As madrileñas foron superadas por outras galegas, do Poio Pescamar, que son xa líderes en solitario.
Así, o Futsi ocupa actualmente a segunda posición, con 11 partidos disputados e ningunha derrota, con 29 puntos procedentes de nove vitorias e dous empates. De feito levan tanto tempo sen caer derrotadas que case se perde a conta dos meses que acumulan invictas.
Un balance case completamente contrario ao do Cidade de As Burgas. As ourensás ocupan tamén a segunda posición, pero pola cola, con seis puntos obtidos nunha solitaria vitoria e tres empates.
No anterior encontro que enfrontou a galegas e madrileñas, disputado en Ourense, as segundas leváronse a vitoria por un 2-4. Naquel entón as ourensás eran colistas da clasificación e non puideron facer fronte ao entón líder.
Porén, as do Cidade deron mostra da súa garra e logrou empatar o tempraneiro gol do Futsi Atlético. As madrileñas seguiron presionando para levar o 1-2 ao descanso, aumentando a súa renda tras a reanudación chegando ao 1-3. Un tanto da debutante Carlota Garayzabal puxo o 2-4 final.
O Cidade é o equipo con máis partidos disputados da categoría
Outro punto en contra da permanencia das ourensás está no número de partido disputados. O Cidade de As Burgas é un dous poucos equipos que non se viu afectado por casos de COVID-19 nas súas filas, polo que só tiveron que adiar aqueles que as enfrontaban a conxuntos con positivos.
Así, chegadas á xornada 16 as galegas levan 13 partidos disputados, o máximo no Grupo A da máxima categoría. Tendo en conta que rivais directos como o Teldeportivo e o Amarelle teñen un partido menos, isto bríndalles unha oportunidade máis para soterrar ás de Codeso.
De todas formas, no Cidade aínda teñen pendente competir contra o Penya Esplugues, no encontro da décima xornada.
Aínda así, a tempada complícase para as galegas, sobre todo despois de perder ante un rival directo e colista, o Teldeportivo, na celebración da 15ª xornada.
O Cidade de As Burgas dalle a primeira vitoria ao colista (2-4)
