Primeiro golpe para o Cidade de As Burgas na segunda fase. As xogadoras que adestra o técnico galego Manolo Codeso estaban nunha dinámica de traxectoria ascendente, que agora vese freada polo Rayo Majadahonda. As madrileñas deron a sorpresa no pavillón Paco Paz cunha goleada as locais por 0-5 na cuarta xornada.
As locais aguantaron durante a meirande parte da primeira metade os ataques rivais e mesmo tiveron oportunidades, pero unha vez as visitantes abriron a lata xa non houbo volta atrás.
O Cidade de As Burgas aguantou coa portería a cero 10 minutos
Manolo Codeso sacou como quinteto titular a Ana Lastra, Lucía Nespereira, Fara Antolín, Ame e Clara Fernández, algunhas das súas futbolistas que adoitan gozar da súa confianza de inicio.
Os primeiros minutos estiveron marcados pola igualdade entre ambas as dúas escuadras. Esta situación obrigou ao adestrador visitante a solicitar un tempo morto no ecuador da primeira parte. O certo é que as indicacións do técnico deron os seus frutos e no minuto 10 de partido chegou o tanto de Coral, que abría o marcador para o Rayo Majadahonda.
Cinco minutos despois, a mesma Coral rondaba a portería local, e case anotaba o segundo, a medida que avanzaba o cronómetro a confianza das madrileñas no seu fútbol incrementábase. Isto provocou que o adestrador do Cidade de As Burgas, Manolo Codeso, decidira parar o reloxo, cando só faltaban 4:44 minutos para a pausa.
Pero ao contrario do que pasara coas do adestrador visitante, as instruccións do técnico local non funcionaron, e un Rayo Majadahonda, xa crecido sobre a pista, seguiu facendo dano ao Cidade de As Burgas.
O segundo tanto chegaría no minuto 19, do pé de Vero tras un aviso previo de Pitu. Aínda con máis que dicir, as visitantes anotaron de novo, sen deixar tempo para a reacción galega, con gol de Cels, poñendo o 0-3 ao descanso do partido no Paco Paz ourensá.
As locais sufriron na segunda metade
Despois da pausa, os nervios eran palpables no Cidade de As Burgas. As ourensás xa se estaban afacendo a gañar os partidos e este marcador en contra lembraba á primeira fase, unhas sensacións das que as galegas queren fuxir para amosar sobre o parqué o seu mellor futsal.
Os primeiros minutos tras a reanudación do encontro estiveron marcados polas faltas locais, que lle valeron recibir un cartón amarelo a Ana Lastra, pero tamén á visitante Vero.
O cadro ourensán aguantaba sobre a pista do Paco Paz, pero non avistaba a remontada. Por iso, Manolo Codeso volveu a parar o cronómetro. Pediu tempo morto a falta de 5:41 minutos para o final. A decisión do técnico foi a de apostar por desplegar na cancha un xogo de cinco, pero o resultado non foi o desexado.
Só un minuto despois do tempo morto do Cidade de As Burgas, Pitu foi quen de marcar o cuarto gol para o Rayo Majadahonda, sen necesidade de achegarse á meta rival. O luminos reflectía un preocupante 0-4 para as visitantes.
O quinto tanto chegaría xa nos intres finais, no minuto 38, obra de Carmen, sentenciando completamente o encontro cun 0-5 a favor do Rayo Majadahonda.
Este resultado representa un tropezo das ourensás do Cidade de As Burgas nas súas aspiracións de confirmar a súa permanencia na elite do fútbol sala estatal e facelo o antes posible, para non xogarse a vida nas últimas xornadas. O conxunto ourensá, con moitas rapazas novas nas súas filas, medrou moito esta tempada co paso das xornadas polo que confían en seguilo facendo.
