O Cidade de As Burgas continúa en traxectoria ascendente na segunda parte da competición e, despois dunha vitoria suma un empate que lle permite seguir sumando puntos para a permanencia. As ourensás disputaron a terceira xornada da Primeira División de futsal ante o Intersala Promesas, cun 0-0 final.
As xogadoras de Manolo Codeso tiveron varias oportunidades da man da incansable Fara Antolín, pero sen sorte. Tampouco a tiveron as rivais a sorte necesaria para puntuar, polo que o encontro rematou cos puntos repartidos, o que lle sabe a pouco ás ourensás.
Fara Antolín, incansable nos ataques
O técnico ourensá, Manolo Codeso, saíu de inicio cun quinteto conformado por: Ana Lastra, Lucía Nespereira, Sonia Pacios, Fara Antolín e Clara Fernández como quinteto titular na cancha La Granja. O encontro comezou pausado, sen grandes ocasións e ningún dos dous bandos, pero coas ourensás presionando a portería rival.
O Cidade de As Burgas foi quen de xerar ocasións, sobre todo nas botas dunha xogadora que cada día medra máis futbolísticamente: Fara Antolín, aos seus 16 anos está a sorprender co seu saber facer e a súa madurez sobre as pistas na máxima categoría. Fara tivo unha moi boa oportunidade no minuto 12. As alarmas das galegas saltaron tres minutos despois, cando a futbolista tivo que se retirar mancada do campo, nunha acción que rematou, por sorte, nun simple susto.
A seguinte ocasión para as visitantes chegou con Clara Fernández como protagonista, pero esta vez a futbolista ourensa atopouse coas mans de Izarbe na portaría do Intersala Promesas, e non puido transformar en gol a súa ocasión.
A falta de acción fixo que o adestrador local solicitase un tempo morto para as mañas, a falta de tres minutos para o descanso. Así e todo, as indicacións do técnico do conxunto de Zaragoza non cambiaron o rumbo do partido, que chegaba á pausa en táboas.
O Cidade non logrou anotar na segunda metade
Para a segunda metade, Manolo Codeso repetiu con catro xogadoras do quintento titular, introducindo a Sol Pedrera no canto de Sonia Pacios. Pero o cambio non mudou o guion do partido, que parecía xa destinado a ter o marcador conxelado no 0-0 inicial.
Os nervios por puntuar comezaban a pasar factura, e Fara Antolín recibiu un cartón amarelo nunha acción por aferrar a unha contraria. Os minutos pasaban e nin Cidade de As Burgas nin Intersala Promesas vían a rede rival. Malia os achegamentos ás metas contrarias, ninguén perforaba o marco do contrincante.
Con tres minutos restantes para o final, esta vez foi o técnico galego, Manolo Codeso, o que optou por parar o cronómetro e recompoñer filas. As instrucións que trasladou ás súas pupilas, tiveron o mesmo resultado que no seu rival. O intento de darlle unha volta ao partido con indicacións de carácter técnico do preparador galego correu a mesma sorte que o seu homólogo no banco local.
Seguían pasando os minutos e o luminoso non se movía no casilleiro de goles. Un tiro da canteirana ourensá Sol Pedrera, aínda que ben colocado, deu coa gardameta Izarbe, e o conxunto local recibía a quinta falta. Ningún dos acontecementos moveu o electrónico, e cando o árbitro pitou o final do partido, os puntos quedaron repartidos para ambos os dous clubs.
O Cidade de As Burgas queda así a estas alturas da competición con 10 puntos no seu casilleiro, empatando co Teldeportivo, pero un posto por riba das canarias, que están na sétima posición. As ourensás levan un balance de dúas vitorias, catro empates e 12 derrotas. Para a seguinte xornada, recibirán ao Rayo Majadahonda, en cuarta posición no grupo da permanencia.
