O Cidade de As Burgas encadea dúas semanas sen perder, e nesta cuarta xornada da fase de permanencia da Primeira División o obxectivo das ourensás son os tres puntos. As de Manolo Codeso actuarán como locais no Paco Paz, ante o Rayo Majadahonda, este sábado, 17 de abril, ás 17:00 horas.
No que vai de segunda fase, as galegas conseguiron todos os resultados posibles: unha derrota, unha vitoria e un empate. Por iso, agora é o momento de encamiñar o seu xogo cara a salvación e retomar a senda do trunfo.
O Cidade e o Rayo Majadahonda teñen sede de vitoria
Con 17 partidos disputados, o Cidade de As Burgas acumula 9 puntos, que se traducen nun coeficiente do 0,529. Desta forma, ocupa a sétima posición, e atópase medio punto de coeficiente por debaixo do seguinte rival, o Rayo Majadahonda.
O balance do equipo que prepara o adestrador galego Manolo Codeso é de dúas vitorias, tres empates e 12 derrotas, e practicamente duplican os goles metidos polos encaixados, con 37 dos primeiros e 72 dos segundos.
O rival madrileño iguala ás ourensás en tantos anotados, tamén con 37, pero é mellor defensa, ao ter encaixado só 48 no que vai de tempada. Cun total de 16 puntos, o Rayo Majadahonda é o cuarto clasificado no grupo polo descenso.
No seu último partido, as que serán as contrincantes do Cidade sufriron unha dura derrota no derbi madrileño ante o CD Leganés. O duelo foi un empate continuio ata os intres finais, cando o Rayo Majadahonda perdeu por un gol rival.
Sen dúbida, este encontro será emocionante, cun cadro local que se xoga saír dos postos de descenso (sendo o equipo mellor posicionado para facelo) e un combinado visitante que quere desquitarse da última derrota.
Vive aquí o partido do Cidade de As Burgas, da man do streaming do Concello de Ourense:
