Non puido ser. As ourensás do Cidade de As Burgas deberán dicir adeus á competición de Primera División, a máxima categoría do futsal español. As galegas certificaron o seu descenso cunha derrota ante o Intersala Promesas, por un 1-2 que se resolveu nos últimos segundos do partido cun gol visitante in extremis.
Só quedan dúas xornadas para finalizar a tempada, pero as galegas xa non terán opción de defender a categoría. O encontro estivo moi igualado de principio a fin, pero o maior acerto das mañas castigou dobremente ás xogadoras locais. O talento das xogadoras albiverdes non foi suficiente para enmendar unha complicada campaña, que rematará co obxectivo sen cumprir.
Con todo o seu futuro en xogo, o Cidade de As Burgas foi recibido pola súa afección antes do inicio do partido. As ourensás puideron sentir todo o apoio da súa xente nunha xornada importantísima, na que finalmente non lograrían asinar a tan necesaria vitoria.
Nuevo recibimiento de nuestra AFICIÓN
SIEMPRE en las buenas y en las no tan buenas.
¡GRACIAS! 💚💚 https://t.co/9ul5ZfQzlT pic.twitter.com/4zEyXWmyXY— Cidade de As Burgas FS (@cidadeasburgas) May 22, 2021
As ourensás loitaron por salvarse en casa
O encontro comezou como un pulso entre ambos equipos, pero cun conxunto visitante máis certeiro. No minuto 11 Ana abría o marcador con gol para as zaragozanas, deixando ás galegas tocadas pero non afundidas. O plantel dirixido por Manolo Codeso seguiu loitando polo resultado co paso dos minutos, coa urxencia de anotar para evitar a derrota.
Cos nervios a flor de pel, Marta viu a primeira amarela do duelo por agarrar a unha xogadora contraria. Acto seguido, o adestrador visitante soliciou un tempo morto, cando restaban seis minutos e medio para o descanso. Antes do pitido do árbitro, Sol Pedrera tirou un penalti que puido supoñer o empate, pero atopuse cunha dobre parada de María del Val.
O Cidade de As Burgas voltou motivado á pista dos Remedios, e foi quen de anotar minutos despois da reanudación, cun tanto obra de Clara Fernández, a través dun potente disparo cruzado desde os tres cuartos de cancha.
O empate non era suficiente para as ourensás, que seguiron pelexando en busca da vitoria. Tampouco as visitantes estaban contentas, polo que o encontro transformouse nun vaivén de ocasións e ofensivas en ambas áreas da pista. Titina enviuou un disparo ao traveseiro e Amelia disparaba fóra xusto despois.
Co partido a piques de rematar, o Intersala optou polo xogo de cinco con Marta como porteira-xogadora. Unha ocasión clara de Guillén case da o trunfo ás mañas, pero Lastra empregouse a fondo para evitalo. A falta de 37 segundos para a fin do duelo, Ana anotaba o segundo tanto das visitantes, a pase de Titina culminando unha contra pola banda dereita.
O 1-2 final sentencia ás de Manolo Codeso, que din adeus oficialmente á Primera División, certificando o seu descenso á categoría de prata. Nas súa conta de twitter o club adiantaba a súa intención de “seguir traballando para volver canto antes”.
O Cidade homenaxea ás súas xogadoras convocadas pola Selección sub19 e sub21
O equipo ourensán conta nas súas filas con xogadoras de gran proxección no fútbol sala español. Ao longo desta semana, Fara Antolín, Sol Pedrera e Clara Fernández foron convocadas polas Seleccións Españolas sub19 e sub21, xunto a outras cinco galegas, para a concentración que enfrontou en dous amigables aos dous equipos.
Antes do inicio do partido dos Remedios, o club quixo homenaxear a estas futbolistas polo premio de formar parte dos combinados estatais.
El club homenajea a las tres jugadoras que fueron convocadas la semana pasada por la Selección Española Sub-21 y Sub-19.
Hacen entrega de los detalles: @gonzalojacome
Alcalde de la ciudad, @jesus_ourense Senador y @GALEUSKO Representante de @GLS_Spain pic.twitter.com/Dnyb2WB16e— Cidade de As Burgas FS (@cidadeasburgas) May 22, 2021
FICHA TÉCNICA
1) CIDADE DE AS BURGAS: Ana López Lastra; Fara, Clara Fernández, Sol Pedrera e Amelia -quinteto inicial-. Tamén xogaron, Lucía Nespereira, Sonia Pacios, Canolich e Aroa Oliveira.
2) INTERSALA PROMESAS: María de Val; Titina, Cynthia Romano, Sara de Oliveria e Ana Sanz, -quinteto inicial-. Tamén xogaron, Marta, San, Vicepi, Icíar Ventura, Paula, Nerea Luna e Lucía Guillén.
GOLES: 0-1, min. 11 Ana Sanz; 1-1, min. 24 Clara Fernández; 1-2, min. 40 Ana
ARBITRAXE: Amor Vizoso e Crespo Pardo do colexio galego. Recibiron tarxeta amarela Marta e Titina do Intersala Promesas e Fara e Lucía Nespereira no Cidade de As Burgas.
INCIDENCIAS: Partido correspondente á oitava xornada da segunda fase da Primera División, do Grupo D, polo descenso. A cita celebrouse no pavillón dos Remedios.
