O Cidade de As Burgas foi digno rival para o líder, pero non foi quen de rascar puntos no encontro deste sábado. As ourensás recibiron no Paco Paz ao Universidad de Alicante, nun encontro moi igualado na primeira metade, pero dominado polas visitantes na segunda (1-2).
O equipo de Manolo Codeso perdeu así unha oportunidade de ouro de manterse con forza na loita pola permanencia na Primeira División. Con este resultado ante un equipo que vía de xogar a Copa da Raíña, as galegas ven a súa salvación pender dun fío, manténdose como penúltimas clasificadas, só por riba do Xaloc Alacant.
O Cidade de As Burgas aguantou na primeira metade
Nos primeiros minutos o conxunto do Universidad de Alicante dominou o balón ante o quinteto titular que puxo en pista para arrancar o cruce Manolo Codeso. Esas cinco futbolistas elixidas polo adestrador galego foron: Ana Lastra, Clara Fernández, Sol Pedrera, Sonia Pacios e Fara Antolín. O tiro de Mariángeles avisaba do perigo da escuadra visitante.
De todas formas, o gol alicantino non chegou dunha xogada ofensiva do Universidad de Alicante. Un despexe de Lastra golpeu en Fara, deixando o balón solto para que Elenita o aproveitase e anotase o 0-1 para o seu equipo no minuto 6. Con todo o encontro por diante, o Cidade non perdeu a motivación e continuou xogando enchufado.
As levantinas controlaban o tempo de xogo, pero as ourensás lles seguían o ritmo. Ao filo do descanso, con cinco minutos para a pausa, o plantel de Codeso obtivo a recompensa ao seu duro traballo. Unha xogada de estratexia a saque de esquina permitía que Nespereira rematase ao segundo pao, onde estaba Clara Fernández agardando. Antes de que o árbitro pitase a pausa, as universitarias tiveron unha dobre ocasión que desperdiciaron.
As ourensás non traduxeron en goles os seus acertos
Despois do paso por vestiarios, o Universidad de Alicante saltou á pista do Paco Paz coa mente posta en manter o dominio do partido. Tamén o Cidade saiu concentrado nas súas posibilidades, deixándoo todo sobre o parqué.
Coa metade do tempo xa superada, Anita poñia un centro perfecto entre liñas para a chegada da súa compañeira Mariángeles, quen dun potente disparo marcaba o segundo para as alicantinas. Xa no tramo final do encontro, e de novo por debaixo, o conxunto galego optou polo xogo de cinco apostando polo empate.
Finalmente os cambios do técnico Manolo Codeso e os tempos mortos pedidos non foron suficientes para acertar de novo na portería contraria. O partido finalizou cunha vitoria para as visitantes, deixando ás loitadoras futbolistas ourensás tocadas para o que resta de tempada.
FICHA TÉCNICA
CIDADE DE AS BURGAS FS: Ana López Lastra; Clara Fernández, Sol Pedrera, Sonia Pacios e Fara Antolín – quinteto inicial -. Tamén xogaron: Canolich, Lucía Nespereira, Aroa, Amelia e Nahir.
UNIVERSIDAD DE ALICANTE FS: Elena; Raquel, Anita, Mariángeles e Rocío – quinteto inicial -. Tamén xogaron: Lara Terrés, Miriam, Pao, Elenita, Aitana e Ana Romero (segunda porteira).
GOLES: 0-1 (min. 6, Elenita); 1-1 (min.15, Clara Fernández); 1-2 (min.31, Mariángeles)
ÁRBITRAXE: Crespo Pardo e Martínez Torres (ambos os dous do Colexio de Árbitros Galego). Recibiu amonestación con cartón amarelo o técnico galego Manolo Codeso, do Cidade de As Burgas.
INCIDENCIAS: Partido correspondente á sexta xornada do Grupo D da Primeira División da RFEF, grupo que loita pola permanencia na máxima categoría do fútbol sala feminino español. O encontro foi disputado no Pavillón Paco Paz da cidade de Ourense).
