A permanencia do Cidade de As Burgas segue en perigo. As ourensás comezaron a segunda volta da fase pola salvación cunha derrota, caendo cun 4-3 ante o Sala Zaragoza.
Malia que o conxunto dirixido por Manolo Codeso comezou o partido coas ideas claras e adiantándose no electrónico, as locais foron quen de remontar antes do descanso e manter a vantaxe na segunda parte.
O Cidade foi de máis a menos
Manolo Codeso sacou a Ana Lastra, Clara Fernández, Ame, Fara Antolín e Lucía Nespereira como quinteto titular, mantendo ás habituais e realizando poucos cambios.
As ourensás saltaron moi motivadas e con enerxía á pista maña, adiantándose ao Sala Zaragoza cun gol tempraneiro no minuto catro, obra de Nespereira.
Co marcador ao seu favor, os seguintes minutos foron de tranquilidade para as galegas, ante un conxunto local que non atopaba a portería contraria.
As xogadoras zaragozanas pararon entón o reloxo para reorganizar o seu xogo, o que deu os seus frutos. Só uns minutos despois de solicitar o tempo morto, Livia Andrade foi quen de empatar o partido, cando este entraba no minuto 15. Sen tempo para a reacción, as futbolistas do Cidade de As Burgas recibiron o segundo en contra dous minutos despois, desta vez Jennifer Souza foi a encargada de anotar.
As mañas conseguiran darlle a volta ao resultado antes do descanso, cambiando os plans de xogo das galegas.
As ourensás non foron quen de remontar
Tras a pausa, Codeso repetiu cinco titular, cambiando a Ame por Sonia Pacios, pero confiando nas xogadoras que iniciaron o duelo na primeira parte.
A igualdade era máxima a medida que o tempo pasaba no partido do pavillón Siglo XXI. Sen que ningún dos dous equipos lograra romper o duelo, e co resultado a favor do Sala Zaragoza, o adestrador do Cidade decidiu pedir unha pausa a falta de 7:54 minutos para o final.
Porén, as súas pupilas non reaccionaron e, lonxe de anotar, recibiron o terceiro tanto da tarde, marcado por Laura Boix. Cunha distancia xa de dous goles en contra, as ourensás seguiron loitando cada acción.
Así, chegou un penalti a favor das galegas, que tirou con confianza Sol Pedrera para poñer o 3-2 no electrónico. A remontada semellaba xa posible, pero na última ocasión do partido Paola pechou o encontro marcando para o Sala Zaragoza, rematando o partido cun 4-2.
