O pavillón Daniel Cordido de Lugo foi o escenario do IV Campionato de España sub20 Feminino de hoquei, no que o club organizador, o galego CHL Meigas, rematou en sexta posición. As galegas foron eliminadas polo CP Vila-Real, nun encontro igualado que rematou nun 3-2.
O campión foi o CPL Valladolid, engadindo ao seu palmarés o seu primeiro campionato estatal desta categoría. O equipo pucelano superou na final por un 5-0 ao CPH Skulls Almàssera, cunha gran primeira parte na que foron quen de anotar catro goles.
As vallisoletanas realizaron unha competición sobresaínte no torneo organizado polo Meigas, dominando de principio a fin desde e fase de grupos ata as eliminatorias. Tras vencer os seus tres partidos da primeira rolda clasificatoria, na semifinal venceron a CDE PL Madrid por un 5-1. No plano individual, destacaron coa máxima goleadora (Mar de Saja), mellor asistente (Elisa Díez), MVP do Campionato (Olvia Monjas), mellor porteira (María Sierra) e a mellor xogadora da final (Jimena Díez).
Pola súa parte, o CPH Skulls Almàssera deu a sorpresa no Campionato de España sub20, conseguindo o pase á primeira final da súa historia.
