O Diario Oficial de Galicia publicaba o pasado 13 de xullo a Orde pola que se establecen as bases reguladoras para a concesión de prazas, en réxime de concorrencia competitiva, de tecnificación e rendemento deportivo para o Centro Galego de Tecnificación Deportiva (CGTD) para a tempada 2023-2024.
As federacións deportivas galegas aínda poden presentar as solicitudes de xeito electrónico para os seus deportistas antes do 14 de agosto, segundo informa a Secretaría Xeral para o Deporte da Xunta de Galicia.
Coma nos anos anteriores, mantense o número total de prazas en 160 estando distribuídas da seguinte maneira: ata un máximo de 105 prazas para o grupo de tecnificación -84 residentes e 21 externos- que se distribuirán entre os cursos de 3º e 4º da ESO e 1º e 2º de Bacharelato; así como 55 prazas para o grupo de rendemento -12 residentes (non podendo ser máis de 7 do mesmo sexo e como máximo 4 da mesma sección deportiva) e o resto externos ata completar as prazas ofertadas-.
Por outra banda, é importante destacar que en ambos grupos, tanto no grupo de tecnificación coma no de rendemento, resérvanse un 5% das prazas ofertadas para persoas con discapacidade (en caso de non seren ocupadas pasarían a ser ocupadas pola cota ordinaria), e outro 10% das prazas resérvanse por parte da Secretaría Xeral para o Deporte para seren ocupadas durante todo o curso académico en función de situacións de urxencia ou necesidade, cumprindo sempre os criterios de excelencia deportiva e nivel académico.
Cómpre destacar asemade que se contabilizan a maiores un total de 20 prazas destinadas aos compoñentes dos equipos nacionais de piragüismo, que desde 2021 pasado preparan o camiño olímpico cara París 2024 en Galicia.
As prazas de tecnificación quedan finalmente repartidas da seguinte maneira segundo as 13 especialidades deportivas coas que contará o CGTD nesta tempada: atletismo lanzamentos (4 prazas de residente), bádminton (7 prazas de residente), judo (8 prazas de residente), loita (7 prazas de residente), natación pura e augas abertas (6 prazas de residente), natación artística (5 prazas de residente), piragüismo slálom (4 prazas de residente), piragüismo AT (17 prazas de residente), remo (4 prazas de residente), taekwondo (8 prazas de residente), tríatlon (7 prazas de residente), vela (4 prazas de residente) e ximnasia (3 prazas de residente).
Persoas colaboradoras na residencia do CGTD
Ademais, o pasado mércores 9 de agosto, o Diario Oficial de Galicia publicaba a Orde do 28 de xullo de 2023 pola que se establecen as bases reguladoras para a concesión de bolsas, en réxime de concorrencia competitiva, para persoas colaboradoras na residencia do Centro Galego de Tecnificación Deportiva para o curso 2023/24, e pola que se procede á súa convocatoria.
En total convócanse 6 prazas de colaboradores (3 para cada sexo) co obxectivo de ter unha representación con paridade para poder garantir unha correcta atención ao colectivo de deportistas do centro.
Os beneficiarios das bolsas completan a súa formación como estudantes á vez que se familiarizan con actividades relacionadas coas saídas profesionais dos estudos que están a cursar. Ademais, estas persoas disporán do aloxamento de domingo a venres e manutención completa (de luns a venres), servizo de lavandaría, instalacións deportivas, servizo médico-deportivo e servizo de fisioterapia.
A concesión destas bolsas é compatible coa obtención de axudas ao estudo, agás aquelas que teñan como compoñente o pagamento de gastos de comedor e/ou residencia escolar, explican desde a Secretaría Xeral para o Deporte.
As bolsas terán, como mínimo, unha duración dun curso escolar (de setembro a xuño) e poderán ser prorrogadas ata que a persoa beneficiaria remate os seus estudos sempre que cumpran cos requisitos e obrigas recollidas na convocatoria. As solicitudes poderanse presentar ata o 11 de setembro.
O Centro Galego de Tecnificación Deportiva de Pontevedra
O Centro Galego de Tecnificación Deportiva de Pontevedra (único en Galicia) naceu no ano 1987-88 co obxectivo de converterse na instalación de referencia a nivel deportivo na nosa comunidade, en busca da excelencia competitiva, unha excelencia que contempla, por suposto tamén, a formación académica dos deportistas coa finalidade de conseguir a súa formación integral.
No 2007 e 2010 incorpóranse respectivamente á órbita e área de influencia deportiva do CGTD as instalacións do Centro Deportivo Pontillón do Castro e o Centro Galego de Tecnificación de Vela en Vilagarcía, ampliando así a oferta de seccións deportivas que a día de hoxe conta cunha moi ampla variedade.
O balance fala de 22 deportistas olímpicos e 2 paralímpicos, dos cales os últimos Antía Jácome e Caetano Horta, pasaron polas instalacións do CGTD cunha colleita total de 11 medallas dende Sídney 2000. Pero non se queda só ahi, grandes atletas que cada ano participan en europeos e mundiais pasaron e seguen pasando por un centro que opta a seguir sendo por moitos anos máis un referente do deporte galego e estatal.
