A atención aos deportistas do CGTD no curso 2020/2021 complétase coa concesión de seis prazas de colaboradores a través dunha bolsa.
O Diario Oficial de Galicia vén de publicar este luns a resolución do 17 de setembro de 2020, da Secretaría Xeral para o Deporte, pola que se fai pública a lista definitiva das prazas concedidas para persoas colaboradoras na residencia do Centro Galego de Tecnificación Deportiva (CGTD) para o curso 2020/21.
En total concedéronse seis prazas de colaboradores (catro mulleres e dous homes) para garantir unha correcta atención ao colectivo de deportistas do centro. Búscase dotar de persoal de apoio no eido educativo e asistencial a residencia para a atención dos deportistas menores de idade.
Os beneficiarios das bolsas completan a súa formación como estudantes á vez que se familiarizan con actividades relacionadas coas saídas profesionais dos estudos que están a cursar.
As persoas beneficiarias destas bolsas disporán do aloxamento de domingo a venres e manutención completa -de luns a venres-, servizo de lavandaría, instalacións deportivas, servizo médico-deportivo e servizo de fisioterapia.
Segundo explica a Xunta de Galicia: “A concesión destas bolsas é compatible coa obtención de axudas ao estudo, agás aquelas que teñan como compoñente o pagamento de gastos de comedor e/ou residencia escolar”.
