Semellaba que si, pero non. O Hockey Club Borbolla empezou gañando o seu cruce na 4 ª xornada da Ok Liga co Cerdanyola chegando a poñerse 2-0 no marcador electrónico. Julia Cabanas marcaría o primeiro tanto e Lucía Yáñez, o segundo gol. Os sorrisos agromaban nas filas coruñesas, e na mente do público que acudíu ao Pavillón de Monte Alto paseábase a idea de que se podía gañar, esta vez si. Acariñábase ese ansiado primeiro triunfo e ía ser na casa.
Sen embargo, todo daría a volta e se viría a baixo coa lesión da cancerbeira chilena do Hockey Club Borbolla, Fernanda Tapia. A súa saída do parqué descolocou ás locais que viviron momentos de certo desconcerto no xogo, unha circunstancia que souberon aproveitar intelixentemente as xogadoras visitantes.
A porteira Eden Avecilla, que xa xogara varios partidos antes da chegada de Fernanda Tapia, tivo que saltar á pista, pero, dadas as circunstancias, o fixo en frío, case sen quencer e sen contar con ter minutos neste partido. Nada máis saír atopouse coas catalás volcadas na súa portaría.
Sobre a pista, pouca xogada combinada e moitas idas e vidas dunha portaría á outra. O partido estaba tolo e iso non interesa nunca a quen vai por diante.
Cambio de porteira por lesión no Borbolla
A xoven porteira coruñesa fixo o que puido, pero os contragolpes constantes dun e outro equipo fixeron que a súa meta empezara a recibir demasiadas embestidas. Caeu o primeiro 2-1, obra de Daiana Silva. e logo o segundo 2-2, de Gemma Solé. En medio Lucía Yáñez tivo un libre directo que non foi quen de materializar.
Tería sido un gol sanador que volvese a poñer o partido de cara para as herculinas. Pero hoxe, tampouco tocaba gañar. A segunda ocasión de falta directa foi para Julia Cabanas, pero tampouco viu porta. Si o fixo, ao fío do fin do primeiro período o Cerdanyola a través dun disparo de Gemma Solé. Co 2-3 se chegou ao descanso.
Con cinco minutos consumidos da segunda metade, Joana Xicota volvía anotar para as catalás 2-4. Gemma Solé volvía marcar, desta volta transformando unha falta directa 2-5, e o equipo visitante collía unha vantaxe preocupante no marcador.
Polo HC Borbolla terían dúas ocasións máis de transformar falta directa Lucía e Lara Yánez, pero estaba claro que non era o día para anotar dese xeito no caso das coruñesas, que seguían por detrás no electrónico en Monte Alto.
A puntilla do Cerdanyola chegou na recta final do partido
Nos últimos dous minutos chegou a puntilla en forma de dous tantos que colocaron como resultado final un tanto máis avultado: 2-7. O sexto foi o cuarto de Gemma Solé, convertida nun pesadelo ofensivo para as coruñesas polo seu acerto anotador, e o sétimo tanto supuxo o primeiro para Laia Pera, case sobre a bucina.
As de Carles Marín marcharon cos puntos baixo o peto e seguen na zona alta da táboa, mentres que as de Santi Martínez terán que agardar outra xornada máis para conseguir esa ansiada primeira vitoria.
O seguinte rival, o Telecable da coruñesa María Sanjurjo
Na vindeira fin de semana, tócalle ás coruñesas visitar en Gijón ao conxunto do Telecable o sábado 24 de outubro de 2020 ás 19:15 horas. Alí milita a patinadora herculina María Sanjurjo, ex do Hockey Club Liceo e agora xogando en terras asturianas. Trátase doutros dos equipos instalados cómodamente na parte noble da clasificación, e polo tanto outro oso que será duro de roer para as galegas.
As asturianas so empataron un partido, xustamente co Cerdanyola 1-1. O resto de cruces os contabilizan como triunfos. Metéronlle 0-7 ao Alcorcón na súa casa, endosáronlle un 5-0 ao Garatge Plana Girona Club Hockey e veñen de gañar en Las Rozas 1-5. Así que pintan bastos para as de negro e vermello. O seu técnico, Santi Martínez, xa avisaba antes deste partido de que acadar unha vitoria sería moi importante. Logo desta xornada aíndao é máis.
FICHA TÉCNICA
HC BORBOLLA: Fernanda Tapia (P), Julia Cabanas, Fernanda Muñoz, Lucía Yáñez, Beatriz Pereira – quinteto inicial -, tamén xogaron: Antía Rivadas, Alba Díaz (C), Marta Vilas, Lara Yáñez e Edén Avecilla (P).
CERDANYOLA CH: Mariona Suros (P), Joana Xicota, Daiana Silva, Adriana Gutiérrez, Gemma Solé – quinteto inicial -, tamén xogaron: María Figuerola e Laia Pera (C).
GOLES: 1-0: Julia Cabanas. 2-0: Lucía Yáñez. 2-1: Daiana Silva. 2-2: Gemma Solé: 2-3: Gemma Solé. 2-4: Joana Xicota. 2-5: Gemma Solé. 2-6: Gemma Solé. 2-7: Laia Pera.
ÁRBITROS: Francisco José, Martínez Suárez, colegiado principal, Nicolás Morandeira, cronometrador. Viron cartulina azul polas locais: Julia Cabanas e Lucía Yáñéz, e polas xogadoras visitantes foron amonestadas con tarxeta azul as seguintes deportistas: Joana Xicota, Daiana Silva, Laia Pera e Gemma Solé.
INCIDENCIAS: Partido correspondente á 4ª xornada da OkLiga feminina de hoquei a patíns, disputado no Pavillón Polideportivo de Monte Alto en A Coruña. Con público pero entrada reducida por mor do protocolo de prevención da COVID-19.
