Para o reto da nova LF Challenge, o Celta Zorka Recalvi renova a dúas das perlas da súa canteira: Lucía Fontela e Sara Vidal.
As dúas xoves xogadoras celestes continuarán vinculadas á entidade viguesa durante a tempada 2021/2022. Fontela puido debutar en outubro do 2018, cando o equipo militaba en Liga Feminina 2, nun partido ante o CB Arxil. Desde entón, a viguesa continúa formando parte do primeiro equipo do club.
Na pasada campaña, a xogadora disputou máis de 400 minutos, anotando 68 puntos, cun promedio de 1,3 rebotes e 0,8 asistencias.
Pola súa banda, Sara Vidal foi a seguinte xogadora en debutar co Celta Zorka Recalvi, tamén en outubro do 2018. Coa súa renovación, a de Nigrán cumprirá a súa oitava tempada como celeste.
A alero fixo un promedio de 37,5% de acerto desde os tiros de dous puntos, xogando en nove partidos na Liga Feminina 2.
Noa Comesaña deixa o Celta
No bando contrario, a tamén canteira Noa Comesaña non seguirá nas filas do Celta Zorka Recalvi. Así o anunciou a propia xogadora, cunha emotiva mensaxe en redes sociais.
“Punto e final á miña etapa de formación. Non podo dicir nada máis que GRAZAS a todos os que se cruzaron no meu camiño durante estes 12 anos”, recorda a xogadora.
Comesaña agradece o apoio e axuda recibidos polos distintos membros do club e á propia entidade, que califica como “a miña segunda familia”.
“Vigo sempre vai ser o meu fogar e Navia sempre se sentirá como casa”, remata.
fin💔 pic.twitter.com/eevBl662xl
— Noa Comesaña💜 (@noacomesanha) June 29, 2021
A súa xa ex adestradora, Cristina Cantero, destacou a súa “personalidade, esforzo e compromiso”, asegurando que “faraite vivir experiencias e desfrutar delas. Botarémoste de menos, o teu día a día e a túa loita, e por suposto o teu sorriso en todos os momentos”.
La vida tiene un camino y tú vas en el con un gran paso y dejando huella. Tu personalidad, tu esfuerzo y tu compromiso te hará vivir experiencias y disfrutar de ellas. Te echaremos de menos, tu día a día y tú lucha y por supuesto tu sonrisa en todos los momentos . Mucha suerte !!
— Cristina Cantero (@Canteroostos) June 29, 2021
